Lawngtlai, March 24, 2022 : Vawiin khan CMO Conference Hall, Lawngtlaiah World TB Day (TB Mukt Bharat Abhyan)  hman a ni a, he hun hi Pu H. Biakzaua, MLA & Vice Chairman, Agriculture Development Board chuan khuallian niin a hmanpui. 

Pu H. Biakzaua chuan ngawr natna (TB) chu khawvela thihna thlentu natna hluar berte zinga mi a nih thu sawiin, enkawlna ṭha tak a awm tawh chunga vei thar leh thihpui an la tamzia ngaihtuahin TB ûm bo tûra hma laknaah tha thlah a thiang lo tih a lang chiang hle a ni, a ti a. India ramah kum 2025 hmaa TB natna um bo tum a nih avângin Mizoram sawrkar pawhin a ngai pawimawh hle tih sawiin, TB chungchang inzirtirna leh a vei zawn chhuah hna kalpui reng a nih thu leh District level committee hrang hrang din a, tha thlah lova hma lak reng a nih thu a sawi.

Pu H. Biakzaua, MLA chuan TB chu awlsamtea enkawl dam theih natna a nih tawh thu leh hmanlai anga hlauhawm a ni tawh lo tih sawiin, 'he natna tlanglawn hi i umbo tlang ang u' a ti a. Lawngtlai District chhunga TB um bo tura hma laknaa a ṭul apianga hmanah ₹ 10,000/- (cheng sing khat) chu thawktute hnenah a hlan nghal a ni.

He hunah hian Pu H. Biakzaua chuan Lawngtlai District-in hriselna kawnga hma a sawn theihna tur sawrkarin a ngai pawimawh hle tih sawiin, clinic centre eng emaw zat hawn belh tura ngenna tihlawhtlinga Lawngtlai khawpui chhungah clinic thar pali leh Sangau Block chhungah clinic thar pasarih hawn phalna tihchhuah a nih tawh thu te, District khawthlang lamah pawh phalna hmuh thuai beisei a nih thu te sawiin, sawrkar chungah lawm thu a sawi nghal bawk.

Lawngtlai District-ah TB vei hmuh chhuah kum 2018-ah mi 118, kum 2019-ah mi 128, kum 2020-ah mi 94, kum 2021-ah mi 71 leh kum 2022 kum kal mekah mi 26 an awm a. Kum 2018-ah enkawl dam mi 117 leh thihpui mi 1, kum 2019-ah enkawl dam mi 125 leh thihpui mi 2, kum 2020-ah enkawl dam mi 89 leh thihpui mi 3 leh kum 2021-ah enkawl dam mi 68 leh thihpui mi 2 awmin, tunah enkawl lai mek mi 26 an awm a ni.

TB damdawi ei ṭhat loh vang leh chhan dang vanga damdawiin hna a thawh ṭhat theih lohna Multidrug Resistant TB (MDR-TB) damlo Lawngtlai District-a mi 13 hmuh chhuah tawhah mi 11 chu enkawl dam tawh niin, mi 1-in a thihpui a, isolation ward-a enkawl lai mek mi 1 a awm a ni.
District TB official-te chuan TB hrik en leh damlo enkawlna chu sawrkarah a thlawn vek a nih bakah, damdawi ei chhung (thla ruk chhung) zawng thla tin ₹ 500/- pek an nih thu leh inenkawl zawh hnuah ₹ 750/- pek ṭhin an nih thu sawiin, TB chu enkawl hma a, ṭha taka damdawi ei chuan a dam hma a, harsatna nasa zawk a pumpelh theih tih an sawi.

MLA Pu H. Biakzaua hi Pu Lalropuia Chinzah EM, Pu BN Thangpuia EM, Pu Sanghuliana Mualchin Chairman Town Committe, leh Pu CL Lianzuala Dy. Chairman LADC te leh MNF Dist. Hqrs Lawngtlai President Lalramliana Colney, Treasurer Pu Lalzahawma Chinzah ten an tawiawm a ni.

Post a Comment

Powered by Blogger.