Lawngtlai, March 25, 2022 : Vawiin khan 11th Lai Autonomous District Council Budget Session chu Pu VL Hmuaka, Chairman kaihhruaina hnuaiah neih a ni.
Vawiina session-ah hian rorelna kalpui hmain MDC boralte tate; Pu C. Sangchhunga, Ex-MDC leh Pu Lalthlamuana, Ex-MDC te sunna neih a ni. Pu C. Sangchhunga hi October 16, 1955 ah piang a. Kum 1994 ah Bazar VC member-ah thlantlin a ni a, VC ah hian term 6 thlantlin a ni a, VCP hna term 3 a chelh bawk. Kum 2015-2020 term-ah Bazar bial atangin MDC ah thlantlin a ni a, Executive Member i/c Agriculture etc. hna a chelh a. November 27, 2021 khan ropuina ramah a chawl ta a ni.
Pu Lalthlamuana hi August 4, 1950 ah Tuithumhnar khuaah a piang a. Kum 1992 ah Bungtlang South bial atangin MDC ah thlantlin a ni a, kum 1992-1997 term chhungin Vice Chairman, Planning & Development Board hna a chelh a, kum 2002-2005 ah nominated member niin, Adviser to CEM hna a chelh. Kum 2005-2010 term-ah Tuithumhnar bial atangin MDC ah thlantlin a ni leh a, EM i/c Revenue hna a chelh bawk. Kum February 15, 2022 ah ropuina ramah a chawl ta a ni.
Vawiin Budget Session-ah hian Pu C. Lalmuanthanga zawhna chhangin Pu V. Zirsanga, CEM LADC chuan Lawngtlai By-Pass road, Thingkah atanga FCI Godown panna siamnaah hian pawisa sanction zat chu nuai 774.71 a ni a, sum hman tawh zat chu nuai 746.40 a ni a ti. CEM chuan Lawngtlai By-Pass road hi 10.50km laih tura ruahman a ni a, 6km laih tawh a ni a, hna hi 62% vel thawh tawh a ni. Sanction amount atanga State in pawisa a la release loh zat chu nuai 28.31 a ni tih a sawi.
CEM chuan he project hi tun dinhmunah chuan a hlawhchham titih deuh tih a sawi a, hetia hna a sukuk deuh hi LADC thiamloh deuha ngaihna chin pawh a awm thei tih sawiin, LADC chuan tihhlawhtlin ngei tumin hma a la tih a sawi. CEM chuan he hnathawktu HSCL te thiamlohah a ngaih thu a sawi a, HSCL te hnenah hian hnathawh nana sum an hmuh ang angte pek a nih thin thu a sawi a, an ni hian an hnuaia thawkte sum an pe tha lova, a thawktu hian a thawk duh lo tih a sawi bawk. CEM chuan he project hi titawp turin DC&MA in ruahmanna a nei tih a sawi a, he project tihhlawhtlinna tur kawngah hian engtia hmalak tur nge tih hriat a har a, amaherawhchu hlawhtling tur anga beiseina a awm a nih chuan LADC chuan a enzui zel ang a ti.
Dr. Lorrain Lalpekliana Chinzah zawhna chhangin Pu C. Rongura, EM i/c Taxation chuan tun financial year chhungin Entry of Goods into Market Tax ah Rs. 431894 hmuh a ni tih a sawi.
Pu V. Zirsanga, Chief Executive Member, LADC chuan kum 2022-2023 atana LADC sawrkar sum hman tur ruahmanna (Budget Estimate) cheng Nuai 20983.96 leh Supplementary demand for grant of LADC for 2021-2022 cheng nuai 1805.79 leh Schedule of demand for Grants of LADC for 2022-2023 te chu house sawiho tur leh pass turin a pharh a ni. Kum 2022-2023 LADC Budget atang hian thawktute hlawhah nuai 16993.28 dah a ni a, national pension scheme matching share-ah nuai 110, pension & other retirement benefit-ah nuai 2205.18, Non salary nuai 1233 dah a ni a. VC MFG Grant (Salary nuai 55, Non salary nuai 127.50), avaiin nuai 182.50 dah a ni a, Local Revenue Collection non salary-ah nuai 260 dah a ni.
Vawiin Budget Session-ah hian CEM, LADC chuan Bill paruk; 1) The LADC (General Service) Rules, 2022, 2) The LADC (Engineering Service) Rules, 2022, 3) The LADC (Finance and Accoount Service) Rules 2022, 4) The LADC Sports and Youth Services Department (Group A,B & C Technical post) recruitments Rules, 2022, 5) The LADC (Group A,B,C&D) Recruitments (Second Amendment) Rules, 2022, 6) The LADC (Junior Engineer and Sectional Assistant) Recruitment Rules, 2022 te chu house-ah sawiho a, pass turin a pharh bawk a ni.
Budget Session hi Thawhtanni, March 28, 2022ah chhunzawm leh tur a ni a, CEM, LADC in Budget a pharh tak sawihona neih a ni ang. LADC Budget Session hi March 30, 2022 a zo tur a ruahmanna siam a ni.
Post a Comment