Rauthla, March 14, 2022 : December 15, 2017 a Mumbai International Airport Terminal-a ruihhlo methaqualone kg 3.9 zet nena man Mizoram Table tennis Champion Lalrinpuia (19) chu Mumbai Taloja Jail-a kum li a tan hnuah thiam changin a chhuak.

Narcotics control bureau (NCB) te chuan Lalrnpuia hi Mozambique atanga a lo haw chu Mumbai International Airport Terminal-ah lo dapin, a bag-ah hian he ruihhlo hi an hmu a, an man ta a ni.

Mizoram Table Tennis Star Indian National Player Lalrinpuia s/o Lalchhuankima Maubawk Veng hi kum 2017 khan Mozambique ah a țhianpa, Mizoram Table Tennis Star ve bawk Lalhunhlua, New Capital Complex nen New Delhi-a an chenna hmun a țangin African mihang pakhatin bia in an inkawm a, Mozambique-a kalna tur ticket ka nei a induh chuan a thlawnin inkal thei ang a ti a. Tichuan an ni țhiandun chuan lawmtakin kan hman lai tak a nia kal ila tiin an kal dun ta a ni.

Mozambique hmun hrang hrang, hmun lar leh tourist ten an tlawh țhin te tlawh dunin ni hnih an cham hnuin India ram panin lo let an tum ta a. Mahse an ticket neih hi ni indawt a ni a. Hunhlua hi rawn thlawk haw hmasain, mihang inchei smart thlerhthlawrh tak mai hian 'hei hi khawngaihin min lo ken ta che, Delhi-ah ka chhung ten Airport ah an lo lam ang' tiin thawmhnaw niawm tak chu a thawn a, a ni pawh hian a han dap thuak thuak a, pheikhawk niin ka hria a tiin amah Nunhlua chuan a sawi.

A tuka Rinpuia rawn haw pawh chu 'thuamhnaw min lo kensak ta che' tiin an rawn ken tir leh a, mahse a ni hi Mumbai Airport-ah lo manin, a bag chhungah chuan a hriat hauh loh, ruihhlo chu lo awmin, thuneitu ten an mansak ta a ni.

Lalrinpuia hi Aizawl a awm niin, Petroleum Sports Promotion Board (PSPB) Table Tennis Academy atanga in zir chhuakin, 77th Junoir & Youth National Table Tennis Championships, Dharmasala ah, 2015 Youth Boys title a lo la tawh a. 2017 Asian Championship-ah pawh India Squad-ah langin China-ah pawh a han feh chhuak ve hman hial. 

Post a Comment

Powered by Blogger.