Lawngtlai, March 30, 2022 : Vawiin March 30,2022 khan District Institute of Education and Training, Lawngtlai atanga D.El.Ed exam 2021 a Mizoram 7-na hauhtu K. Lalenmawii (Mimi-i) chawimawina hun hman a ni.
He hunah hian Pi Ngurhmingliani Chinzah, Principal DIET Lawngtlai chuan thusawiin, hlawhtlinna tak tak chang tur chuan taimakna leh tumruhna a pawimawh tak zet a ni a ti a. Zirtirtu ni tur chuan a hniam ber ah D.El.Ed neih hi a ngai ngei ngei tawh a. Chutiang a nih loh chuan tun hma ang a a ti thei fate zirtirtu an nih ang ngawt kha anih theih tawh loh avangin D.El.Ed degree kan neih theihna tura kan District-in DIET kan neih hi a ram mipuite pawh hian tangkai taka kan hman a ngai a. Zirna In dangte nen a inan loh avangin tih tak zetna, taimakna leh tumruhna zirlaite'n an neih a ngai a ni a ti.
DIET Lawngtlai atanga D.El.Ed exam 2021 a Mizoram a 7-na hauhtu K. Lalenmawii hnenah chawimawina thuziak an hlan bawk a ni.
K. Lalenmawii (Mimi-i) chuan, hetianga dinhmun duhawm tak ka luah theihna chhan hi Principal leh Faculty te inpekna avang a ni a. He ka hlawhtlinna phenah hian ka zirlaipui duhawm tak tak an awm bawk a ni a ti a. DIET a ka zir hun chhung hian kan zirlai chauh ni lo, mihring nunphung tam tak ka zirchhuak bawk a. Chu chuan ka Zirna mai bakah ka nitin nunphung nasa takin min kaihruai a ni a ti bawk.
K. Lalenmawii (Mimi-i) chuan, DIET a ka training chhung hian lehkhabu 50 chuang ka chhiar chhuak hman a. Hei hian ka Zirna mai bakah nungphung tam tak min zirtir a, ka hlawk tak zet a ni a ti a. He hlawhtlinna ka chan theihna tur hian kawng hrang hrangin harsatna ka tawk a, chu harsatna chu inhneh tir lovin ka insiamrem mai zawk thin a, kan chunga thilthleng leh kan thil tawn apiang mila kan inher rem thiam hi a ngai tak zet a ni a ti bawk.
K. Lalenmawii hian DIET Library a dah Turin a lekhabu ngainat em em Pali (4) a donate bawk a ni.
Post a Comment