Champhai, March 01, 2022 : Legal Metrology Department, Champhai nih nikum chung i phungning lo in ramleng lei in lutmi Cigarette an tlaihmi pawl Pack 52000 (khuachung rate in tuak ah nuai 26 - Rs.26,00,000 man) cu zahan chunhlan dar 11 ah khan Controller of Legal Metrology nawlpek bantuk in le District Magistrate hngalhpinak in Legal Metrology Office tual, Champhai, Vengsang ah hrawhral a si.
District Magistrate aiawh in hi caan a hmanpitu Sub-Divisional Magistrate Pu Lalnunfela, Chawngthu nih cun Khuksi le mah he ai pehtlaimi pawl nih ngandamnak a hrawh khawhning le Mizo lak zong ah kan tam cang ning le pumsa le ruahnak ngandamnak ca zong ah a that loning le a herh lo in chawva i liam sawhnak a si ruang ah kan tuah ve awk a si lo a ti. Zapi um tamnak ah le i tonpumhnak ah kuak zu lo ding in kan i cawnpiak a herhnak le Tobacco Industry sin in India ram ah ngunkhuai tampi lak a sinak kong hna chimchap in, phungning lo in ngunkhuai pek lo in thuhmi thil ruang ah ramleng lei in thilri lahluh kong ah harnak tampi a chuah nak le ngandamnak ca ah a tha lomi thil lakluh le zuar le a sining te le phungning te in cazin ah khumh lomi Cigarette lakluhmi pawl daphlai i a tlai tawntu Legal Metrology Department, Anti-Tobacco Squad le Police le Excise and Taxation Department pawl riantuannak hi hlorh awktlak a sinak hna a chim fawn. Bia a chim dih hin mah Cigarette tlaihmi pawl hrawhralnak hi ngeih a si.
Mah caan i i pumhnak hruaitu Pu V.Lalfakzuala, Assistant Controller of Legal Metrology, Champhai nih cun Report tawi a pek i, 'Legal Metrology (Packaged Commodities) Rules, 2011 le The Legal Metrology Act, 2009 nih nawl a kan pek bantuk in mah phung le lam a zul lomi cu tlaih an si tawn nak le mah kong ahhin District Anti-Tobacco Squad le Police le Excise le Taxation Dept hna he tuanti in voi tampi Squad drive hna ngei in daphlai tawn a si a ti i. Phungning lo in luh pimi Cigarette ah hin ngunkhuai pek a si lo i, Central Excise Duty ah le GST zeihmanh pek lo a si pin ah phunglam zul bu tein zuarmi Cigarette pawl tiang in harnak an tong i cucaah an tlaih tawnnak hi a si a ti fawn.
Phungning lo in Cigarette lahluh le zuarmi tlaihmi pawl hrawhralnak caan ah hin Dr Lallawmkima, DIPRO le Legal Metrology Department riantuantu pawl le Press mi pawl le Veng chung YMA member hna an i tel.
Post a Comment