Lawngtlai, February 23, 2022 : Vawiin, February 23, 2022 khan Pu K. Sapdanga, ZPM Working President leh ZPM, Lai District Headquarter; Lawngtlai party hruaitute chuan Lawngtlaiah inkawm khawmna hun an hmang.
Pu MC Lalramchhana, President, ZPM, Lai District Headquarter; Lawngtlai kaihhruai, vawiina inkawm khawmnaah hian Pu K. Sapdanga chuan, "Autonomous District Council huam chhungah kan party in hmasawnna ropui tak kan hmu zel a, hruaitute thawhrimna rah a ni a, kan lawm hle a ni. Mi thar duhawm tak tak lawm luh tur kan lei leh zel a, ruling party hmui zawk bel lova keini engmah nei lo min rawn bel tlat te hi a ropuiin mipui ten kalphung thar kan duh tawh zia a tilang chiang hle a ni" a ti.
"Mi thenkhatin tunlaiin dawt hmangin kan pawl tih darh an tum mek a, thenkhatin thawk dun tur ang tein an lo sawi bawk a, ZPM hian 2023 General Election ah party dang a thawhpui dawn lo tih hi chiang takin kan sawi duh a ni" a ti a. Pu K. Sapdanga chuan, "ZPM chuan hnam inlungrualna a ngai pawimawh hle a, kan ram politics kalphung dik loh avangin Autonomous district council lam unau te rilru a na thin a ni. Zofate inlungrual taka kan khawsak ho theihna turin ZPM chuan hma a la dawn a ni," a ti bawk.
Pu K. Sapdanga hian ZPM, Lai District Headquarter-ah hian a ṭul apianga an hman turin Silpouline bundle khat a hlan a, mi thar chhungkaw 21 aṭangin voters 63 a lawmlut bawk.
Pu K Sapdanga hi Er Lalhmingliana, General Secretary i/c Organisation, Pu LT Danmawia, Secretary, Pu Eddie Lalhmangaihzuala, Secretary, Pu Zohmingliana Khiangte, Secretary leh Pu Zoramsangzela, Joint Secretary ten an ṭawiawm a ni.
Pu K. Sapdanga chuan MJA Press Club-ah thuthar thehdarhtute kawmin, Pu Lalduhoma chu ZPM CM candiadte atan Val Upa Committee ten an ruat thu a sawi a, Pu Lalduhoma hi mipui ten enchhin an duh tih a sawi a. "Lai District-in MLA hmang chang hre tak in nei a, CM in a kuah bik MLA zingah a tel pha lova, District hmasawnna thlengin a tuar" a ti.
Pu K. Sapdanga chuan kum 2023 inthlanah lai District-in ZPM mi ngei Minister in neih theih nan theihtawp kan chhuah ang a ti a, Autonomous District Council chu chak zawka hna a thawh theih nan thuam chak a nih tur thute, central sorkarin direct funding a remti a nih phawt chuan ZPM chuan harsatna siam lo turin ngaihdan kan siam tawh a ti.
Chanchinbumi ten ZPM in sorkarna lo siam ta se, Direct Finance hi lo tih thei si loh se, tuna Autonomous District Council ten State Budget atanga an share hi tih pun in tum em? tih zawhna awm chu Pu K. Sapdanga chuan chhan mai harsa a tih thu leh hemi chungchang hi chu zirchian deuh a la ngai dawn a ni, a ti.
Kuminah MADC ah MDC General Election lo awm turah Candidate neih in tum em tih leh party dangte nen thawhho in tum em tih zawhna chu, MADC General Election lo awm turah hian eng party mah tun dinhmun ah chuan thawhpui kan tum lova, candidate pawh neih ve ngei kan tum a ni, a ti a. Sorkarna siam chungchang ah erawh chuan mipuite'n an aiawh thlang tur an ni a. Mipui kutah a innghat a ni, a ti bawk.
Kum 2018 MLA General Election-ah khan engvangin nge Chakma area ah candidate in neih loh tih leh CADC ah ZPM din anih loh thu party hruaitu thenkhatte'n an sawi a, tunah din anih leh tak, tih zawhna chu Pu K Sapdanga chuan kum 2018 MLA Election ah khan NGO te ngenna avangin Candidate kan nei lova. Tin, ZPM hi recognise party anih hnuah hian CADC area ah ZPM hi din ani lovang tih sawi kan la nei lova. Tunah hian Chakma mite tan ZPM hi din a ngai a ni, a ti.
Post a Comment