Lawngtlai, February 11, 2022 : Integrated Councelling & Testing Center (ICTC), Lawngtlaia Thisen test na atangin kum-2021 chhung khan Lawngtlai District-ah HIV hrikai hmuhchhuah mi 64 hmuhchhuah an ni.



ICTC- Lawngtlaia thawktute chhinchhiah danin kum 2021 chhung khan Lawngtlai District-ah HIV kai leh kailo hriatna turin Thisen test mi 1635 an awm a, heng zingah hian Nu, Naupai lai mi 808 an awm bawk. Thisen test 1635 zingah General a test mi 827 zingah HIV Hri kai mi 56 an awm a, Mipa 42 leh Hmeichhia 14 leh Nu, Naupai Thisen test 808 zingah HIV Hri kai mi 8 hmuhchhuah an awm a ni.

HIV Hri kai leh kailo endik atanga hri kai hmuhchhuah zingah Kum 14 hnuailamah Hmeichhia 1 a awm a, kum 15 atanga Kum 24 inkarah mi-13, Mipa 10 leh Hmeichhia 3 awmin, kum 25 atanga kum 34 inkarah mi 26, Mipa 22 leh Hmeichhia 4, kum 35 atanga kum 49 inkarah mi 15, Mipa 11 leh Hmeichhia 4 leh kum 50 chunglamah Hmeichhia 1 te an ni a. HIV Hri kai hmuhchhuahte zingah General bikah hian thalai kum 25 atanga kum 34 inkarah HIV Hri kai hmuhchhuah an tam ber a, za zelah 45.15% a tling a ni.

Lawngtlai District ah Kum 2020 khan HIV Hri kai mi 38 hmuhchhuah an awm a, kum 2021 ah mi 64 an ni thung a ni. Kum 2020 atanga kum liamta kum 2021 inkara HIV Hri kai hmuhchhuah zat hi mi 26 zetin a pung a ni.

ICTC-a thawktute chuan, Nu, Naupai lai te thisen test dawn in an kawppui te test ve zel a ngai a, hei hi tam takin an ngai pawimawh lo thin a, discordant kan tih, pakhat tha, pakhat thalo a awm theih avangin, Nu Naupai lai leh an kawppuite chu in test vek thei se an duh thu an sawi a. Tin, Covid19 Hrileng avanga inkharkhip avangin, Inchiu thin te ah hriau in hmantawm na atanga HIV lo positive ta hi 44.85% lai an tling thu an sawi bawk.

Post a Comment

Powered by Blogger.