Lawngtlai, February 15, 2022 : Lawngtlai Bawrhsap Dr Andrew H. Vanlaldika hovin nimin khan Lawngtlai District Level Task Force on COVID-19 chu Lawngtlai DC Conference Hall-ah an Chairman, an thu khawm a. Lawngtlai District chhunga hri darh thar leh mek dang chat tura hma lakna kalpui mek dan thlir hovin, hma lak zui zel dan tur an sawi ho.
Lawngtlai Bawrhsap Dr Andrew H. Vanlaldika chuan tunlai hi hri leng thawh thumnain Lawngtlai District-a a vanglai a thlen chhoh mek lai a ni tih sawiin, mi tinin hri laka filhlim tura tih tur leh tih loh turte an zawm that a tul zual tih a sawi a. Kohhran tina SOP Implementation Committee din tawh bakah, veng leh khaw tinah CAB Implementation Team din tura tih a nih thu sawiin, hemi kal tlang hian mahni huam chhungah theuh CAB/SOP zawm tura hma an lak mek thu a sawi.
He thut khawmah hian COVID-19 hri dona kawnga mawhphurhna hrang hrang neitute atangin report leh rawtna ngaihthlak a ni a. Hri dona kawnga harsatna hrang hrang awmte tar lan niin, a chin fel dan tur leh awmze nei zawka hma lak zel dan tur sawi ho a ni.
Tun dinhmunah Lawngtlai District-ah hri kai enkawl lai mi 281 awm mekin, an zinga mi 23 chu raltlan an ni a. Raltlan zinga hri kaite enkawlna atana Lawngtlai AOC Venga Dedicated 4C ruahmanah mi 9 enkawl mek an ni a, khum 15 awmna DCHC Lawngtlaiah mi 3 enkawl mek niin, 4C-a enkawl mi 8 leh mahni in lama inenkawl mi 261 an awm mek bawk.
Post a Comment