Lawngtlai, February 10, 2022 : Vawiin khan Mizoram Journalist Association (MJA), Lawngtlai te chuan MJA Golden Jubilee lawmna kal zelah Lai Autonomous District Council-a Head of Department te tan LADC Hall-ah Media Awarness Campaign a buatsaih. He hun hi Pu H. Lalramenga, Executive Secretary, Lai Autonomous District Council chuan Khualian niin a hmanpui.
Khuallian Pu H. Lalramenga ES LADC chuan kum 2022 chu MJA Golden Jubilee a nih ang bawkin LADC Golden Jubilee pawh a ni ve tih sawiin, Chanchinbu leh media hrang hrang chu mipui vantlang leh sawrkar inkara palai hna thawktu an ni a, sawrkar hna thawkte'n chhawr tangkai thiam a pawimawh a ni, a ti a. LADC-ah chuan Information & Public Relations (I&PR) Department-ah advertisement fund dah niin, HoD-te'n a hranpaa advertisement chhuahna tur sum an nei lo a nih pawhin I&PR Department kal tlanga advertisement chhuah nachang hre thin turin a chah a ni.
LADC-a HoD-te tana media awareness programme buatsaih hi District MJA General Secretary Pu Lalchharliana'n a kaihruai a. Vice President Pu Elvis Lalthangzuala'n inlawmna thu sawiin, resource person Lawngtlai District Information & Public Relations Officer Pu C. Lalhruaitluanga'n "Sawrkar leh mipui rawngbawlnaah media" tih thupui hmangin thu a sawi a. Sawi hona hun hlawk tak hman zui niin, LADC-a I&PRO Pu HC Vanlalruatpuia'n programme-a telte hnenah certificate a hlan a. District MJA President Pu Lalngheta Ralte chuan tlipna thu sawiin hun a khar a ni.
MJA Golden Jubilee lawmna pual hian Lawngtlai District MJA chuan January ni 7, 2022 khan jubilee mei an det a. January ni 28, 2022 khan annual conference hmangin, vawiina LADC HoD-te tana media awareness programme an buatsaih bakah hian, February ni 24, 2022 khian Lawngtlaia state sawrkar department hrang hrang head of office-te tan media awareness programme hi buatsaih leh turin ruahmanna an siam a ni.
Post a Comment