Aizawl. February 22, 2022 : Nimin khan MJA Gen. Hqrs. president Pu Zonunsanga Khiangte chuan kea Mizoram fanchhuah tuma chhimlam pan leh tur Pu Lalbiakthanga, kum 64-na hmang mek chu Sikulpuikawn atangin a vailiam.
Pu Zonunsanga Khiangte chuan Pu Lalbiakthanga’n thuchah hrang hrang - hnam inpumkhatna, thih hnua midangte tana mit pek a pawimawhna, tuihna leh nungcha humhalh pawimawhnate thehdarh pah zel tura ke ngata Mizoram fan chhuah a tumna chu ropui a tih thu sawiin, Pu Lalbiakthanga chu a kal zelna turah Pathian hruaina leh awmpuina dawng zel turin duhsakna a hlan a. A tum hlen chhuak thei ngei tura hriselna tha nei zel tura duhsakna a hlan bakah, Pu Lalbiakthanga’n thuchah hrang hrang a kente chuan rah tha tak chhuah ngei se an duh thu MJA President chuan a sawi bawk.
Lawipu Veng, Aizawl a awm Pu Lalbiakthanga hian kea Mizoram fangchhuak turin February ni 9, 2022 khan Vairengte atangin a tan a. Kolasib tlangdung a fan hnuah Bairabi ah let thla lehin, Bairabi atang hian Mamit tlangdung a fang a, Reiek atanga Aizawl lutin, Mizoram chhim lam fang turin a thawk chhuak leh ta a ni. Zan a riahna tur khuaah te chuan VC te a belbul deuh zel a, a thuchah kente sawiin inkawmkhawmna hun an nei thin a ni.
Post a Comment