Aizawl, February 10, 2022 : ZPM Leader Pu Lalduhoma MLA chuan Cabinet Sub Committee in grape atanga wine siam titawp tura a rawt chu chem lova lulak ang a ni a ti.
Pu Lalduhoma hian nimin khan press statement siamin Sorkar hriatpuina ngeia Grape chingtute hmalakna ti thuanawp tura in hrilh lawk pawh awm miah lova hetia in barakhaih thut hi hriatthiampui harsa an ti tih a sawi a, State hrang hrangah Winery hi Dan hnuaiah mumal taka kalpui a ni tih sawiin thenawm State- Nagaland-ah chuan Dragon Fruit atangin Orgnanic Wine an siam a, bur khat Rs 1100 man lai a ni. Arunachal Pradesh-ah chuan Kiwi atangin Wine an siam a, Excise Duty leh Sales Tax kum 10 chhung an awl nghe nghe. Meghalaya-ah chuan Homemade Wine an uar a, Licence pawh Deputy Commissioner-ten an pe mai a ni a ti a, Sub Committee thutlukna chu Cabinet in ennawn leh se an duh tih sawiina. Sub-Committee thu hi an kaltlang pui dawn a nih pawhin, zangnadawmnate pein, eizawnna danga an pakai leh theihna khawp ruahmanna siamsak ngei se, tih an phut tih a sawi a ni.
Grape chin hian thatchhhiatna leh dawngdahna a um bo tih Pu Lalduhoma chuan sawiin thalaite rilruah rual elna leh taihmakna a pe a, an in leh lovah hmuh theihin hmasawnna a thlen a. Sorkar Policy- “Thingtlang lo neih bansan” tihlawhtlingtu a ni tih sawiin. Hnahlan khua-ah phei chuan a lungleng zual 20/30 bak thingtlang lo nei an awm tawh lo niin an sawi.
ZPM chu kuthnathawktute thian a nih angin, Grape chingtute natnaah hian an na ve a, thinlung takin an tawrhpui tih a sawi ani.
Post a Comment