Lawngtlai, February 24, 2022 : Vawiin, February 24, 2022 khan Lawngtlai District Election Officer Dr Andrew H. Vanlaldika chuan Election Commission of India (ECI)-in India ram pum huapa inthlan chungchang mipui hnena puan darh zau a nih theih nana intihsiakna a buatsaih, "National Voter Awareness Contest" chungchangah Lawngtlaia thuthar thehdarhtute a kawm.
Lawngtlai District Election Officer hi Election Officer Pi B. Malsawmtluangi leh SVEEP Nodal Officer Pu C. Lalhruaitluanga, DIPRO ten an tawiawm a. ECI buatsaih National Voter Awareness Contest-ah hian tu pawh tel theih a nih angin, Lawngtlai District atanga mi tam zawk an tel theih nana hma lak dan turte chu thuthar thehdarhtute nen sawiho a ni a. District Election Officer chuan Lawngtlai District hming thatna tur leh India ram district dangte zinga District hming pho lanna turin Lawngtla District mipuite chu a tam thei ang ber tel turin a sawm a ni.
National Voter Awareness Contest hi January ni 25, 2022 atanga kalpui tan niin, March ni 15, 2022 thleng tel theihna hun hawn a ni a. Thupuiah, "My Vote is My Future: Power of One Vote" tih hman niin, intihsiakna chi hrang panga - thil inhriatsiak (quiz contest), au hla inphuahsiak (slogan contest), hla inphuahsiak (song contest), video insiamsiak (video making contest) leh hriattirna mit la insiamsiak (poster design contest) te a awm a. Lawmman tha tak tak siam niin, quiz-a tel turte chu contest website - ecisveep.nic.in/contest/ -ah inziah luh a, online-a chhan tur a ni a; a bak zawng hi voter-contest@eci.gov.in -ah email hmanga theh luh tur a ni thung. Intihsiakna kaihhnawih hriat tur pawimawh hrang hrang chu ECI website-ah tar chhuah a nih bakah, Lawngtlai District Election Branch-ah zawh fiah theih reng a ni.
Post a Comment