Mizorama ADC pathumte pawisa hman tur atan cheng vaibelchhe 492.03 dah a ni

Aizawl, February 25, 2022 : Chief Minister leh Finance Department changtu Minister ni bawk Zoramthanga chuan Assenbly budget session neih mekah nimin khan House ah kum 2022-2023 atan hman tur Mizoram Budget a pharh a, budget hi thawhtanni session neih leh hunah sawiho a pass tum a ni ang.



CM chuan Mizoram State bil thawh chhuah, State’s Own Revenue atanga kan sum hmuh chu 2020-21 khan 3.51 %-in a tla hniam a; mahse, 2021-22 erawh chuan 29.98 %-in a pun belh ve thung a ni a ti a. CM chuan hrileng avangin kan sum hman chhuahin kan sum lak luh a pha lo leh zual hle mai a. Hemi avang hian kan ramin kan sum lak luh tihpun bakah a theih chen chena inrenchem a tul zia a lang chiang tulh tulh a ni a ti bawk.

CM chuan Sorkar leiba tling khawm chu kum tharah hian cheng vaibelchhe 12,553.08 ni tura chhût a nih thu a sawi a, Debt/GSDP ratio chu 31.81% a ni. Fourteenth Finance Commission period chhung khan leiba enkawlna (debt sustainability) kawngah hma kan sawn chho hle a ti a, GSDP atanga teha kum 2017-18-a 41.85% lai ni chu 2019-20 ah 32.72% ah a tla hniam hman a. Amaherawhchu, sum harsatna avangin tlemin a sang chho leh hret dawn a, 2021-22 (RE) ah chuan 34.40% ah a chho leh a, kum tharah hian 31.81% ah a tlak hniam leh hret beisei a ni a ti.

Budget pharh taka a landanin, Centrally Sponsored Schemes (CSS) hrang hrang atanga sum hmuh tura beisei chu cheng vaibelchhe 2,646.64 niin, heng Scheme dang NLCPR/NESIDS te, NEC te, ST Welfare Grants te, Central Road Funds te leh a dangte atangin cheng vaibelchhe 985.77 hmuh beisei a ni. Sorkar laipui chuan PM-DevINE Scheme hnuaiah North-Eastern Council (NEC) kaltlanga hmalak turin Construction of Aizawl By-pass on Western Side cheng vaibelchhe 500.00 project leh Pilot Project for Construction of Bamboo Link Road, district hrang hranga thawh tur cheng vaibelchhe 100.00-a thawh turte a ruahman bawk.

Sorkar Flagship Programme, Socio-Economic Development Policy (SEDP) hnuaiah cheng vaibelchhe 700.00 dah a ni a, Hemi atanga cheng vaibelchhe 350.00 chu Family Development lam hawi atana hman tur niin, cheng vaibelchhe 100.00 chu sorkar ngaihpawimawh danga a tul ang zela hman atan a ni a, cheng vaibelchhe 200.00 chu Central atanga hmasawnna tur sum Mizoramin a dawn lo doletna tur atan dah a ni a, cheng vaibelchhe 50.00 chu road maintenance atan hman a ni ang.

Kum 2022-2023 atana Mizoram budget pumpui chu cheng vaibelchhe 14,008.14 niin, sorkar inrelbawlna (revenue expenditure) atan cheng vaibelchhe 10,006.51 dah a ni a, hmasawnna hnathawhna tur cheng vaibelchhe 4,001.64 dah a ni thung.  

Post a Comment

Powered by Blogger.