Lawngtlai, February 24, 2022 : Vawiin, February 24, 2022 khan MJA Lawngtlai District huaihawtin Mizoram Journalists' Association (MJA) Golden Jubilee lawmna kal zel denchhenin state sawrkar department hnuaia district office hotu (head of office)-te tan Lawngtlai DC Conference Hall-ah media hman chungchang inzirtirna (media awareness programme) buatsaih a ni a, he hun hi District Bawrhsap Dr Andrew H. Vanlaldika chuan khuallian niin a hmanpui.
Khuallian chuan chuan media hmasawnna nasa tak karah sawrkar hna thawkte'n media hman thiam a pawimawh thu sawiin, District MJA te'n media awareness programme an buatsaih chu lawmawm a tih thu a sawi a. Mahni thil tih puanzar nan media hman tangkai a pawimawh rualin, a kalkawng leh hman danah erawh fimkhur a tul a ni, a ti a. Chanchinbu mite thawhpui thiam tur leh rilru inhawng taka thurawn leh zirtirna ngaithla turin official kal khawmte chu a chah a ni.
Media awareness programme buatsaih hi District MJA Treasurer Pu H. Lalrinmawia'n a kaihruai a. Vice President Pu Elvis Lalthangzuala'n inlawmna thu sawiin, resource person Lawngtlai District Information & Public Relations Officer Pu C. Lalhruaitluanga'n "Sawrkar leh mipui rawngbawlnaah media" tih thupui hmangin thu a sawi a. Sawi hona hun hlawk tak hman zui niin, senior journalist Pu ZD Dengngura'n programme-a telte hnenah certificate a hlan a ni.
MJA Golden Jubilee lawmna pual hian Lawngtlai District MJA chuan January ni 7, 2022 khan jubilee mei an det a. January ni 28, 2022 khan annual conference hmangin, February ni 10, 2022 khan Lai Autonomous District Council (LADC)-a head of department-te tan media awareness programme hi an lo buatsaih tawh a. Vawiin khan state sawrkar hnuaia head of office-te tan media awareness programme hi buatsaih ve lehin, March ni 18, 2022 khian Golden Jubilee lung phum turin ruahmanna an siam a ni.
Post a Comment