Rauthla, November 23, 2021 : Kum tina footballer rawlthar thazual kum 21 hnuai lam hnena an pek thin Golden Boy Award chu Barcelona midfielder Pedri hnenah pek a ni.
Spain golden boy Pedri hi season liam ta khan Barcelona tan vawi 52 a inlan a, league lamah a club chu che tha chiah lo mahse, a mimal angin a che tha hle a, Copa Del Rey title an lak theihna tura a sulsutu ber pakhat a ni. Spain tan vawi 10 inlan tawhin, Euro 2020 ah pawh kha a che tha hle a, Young Player of the tournament-ah thlan niin, team of the tournament-ah pawh a tel pha a ni.
Kum 19 mi Pedri hian a football zinkawng hi Las Palmas-ah a tan a, kum 16 mi a nihin a professional match hmasa ber a khel. Hemi hnu hian kum 2019 khan Barcelona chuan kum 2 chhung atan an lalut.
Golden Boy Award hi Italy sport chanchinbu Tuttosport buatsaih a ni a, kum 2003 atang khan sem tan niin, player 18 in he award hi an lo dawng tawh a ni. Pedri hi Spain player zingah Cesc Fabregas leh Isco tih loah chuan he award dawng leh hmasa ber a ni. Pedri dawtah hian Borussia Dortmund star Jude Bellingham a awm bawk a ni.
Post a Comment