Rauthla, November 23, 2021 : MNF Vigilance Department leh MNF Legal Board-te hmalaknain, Swadesh Darshan Scheme – II hnuaia Mizoram Tourism hmasawnna tura hmalakna hrang hrangah, thildik lo leh fel tawk lo a awm ngei nia a lan avangin Mizoram Lok Ayukta-ah complaint an thehluh tih MNF Legal Board Vice Chairman, Lalpianfela Chawngthu chuan nimin khan thuchhuah siamin a sawi a, He an complaint hi Pu Lalmuanchhana Sailo, MNF Vigilance Department-a an Joint Secretary hmingin an thehlut.
Thuchhuahin a tarlan danin, Mizoram Sawrkar chuan kum 2018 khan Restricted Tender hmangin Sakawrhmuituai tlang Sky Walk leh Durtlang – Chaltlang Ropeway Project atan Joint Venture NEIP leh Ropeway & Resorts Pvt. Ltd. Dwarka, New Delhi-te chu Contractor atan a thlang a. Heng contractor-tehnenah hian Mobilization Advance Cheng Nuai 48 leh sing 5 pek turah Cheng Nuai 287 sing 2 sang 5 pekchhuah a ni an ti a. Durtlang – Chaltlang Ropeway atan Mobilization Advance zat tur chu Cheng Nuai 248.25 a nih laiin Cheng Nuai 1317.80 pekchhuah a ni bawk a ni. Tin, heng Mobilization Advance pawisate hi Mizoram Tourism Department chuan kum 2017-2018 inkar khan a pe chhuaka. Hetiangzat sum leh pai hi Contractor-te hnenah pekchhuah a nitawh chungin heng Project-ah te hian hmalakna mumal hmuh tur vawiin thlengin a la awm lo a, hetiang hi thil awmdan a nih avangin Swadesh Darshan Scheme – II chungchangah hian thil dik lo, sawrkar sum leh pai hmandik tawkloh na leh dan bawhchhiatna a awm ngei niin a lang a ni an ti.
Post a Comment