Lawngtlai, November 29, 2021 : Lawngtlai Deputy Commissioner, Dr. Andrew H. Vanlaldika chuan vawiin khan hriattirna chhuahin, ei leh in siama ei zawng emaw, zuar emaw, deliver theiha mahni in atanga ei-in siam zawng zawngte chu Food Safety & Standards Act, 2006 in a phut angin Food Safety & Standards Authority of India hnuaiah in register vek tur a ni a, Lawngtlai huam chhunga ei leh in zuar (Food Business Operator) zawng zawngte pawh in register turin DC Lawngtlai chuan hriattirna a chhuah a. License/Registration ti tawh sa tan pawh renew theih a ni bawk. Registration ti turte chuan Food and Drugs Administration Wing, CMO Office, Lawngtlaiah zawh fiah tur a ni.
Thuchhuaha tarlan a nih danin Registration hian ei leh in siam chhuah leh zawrh lama inhnamhnawih, a lian ber atanga a te ber thleng- catering, bakery, hotel, restarant, thingpui dawr, pickle siam, ran talh leh zuar, deliver theih tura ei leh in zuar zawng zawngte a huam vek a ni.
Registration hi tum khatah kum khat atanga kum nga chhung atan tih theih a ni a, registration fee chu kum khata cheng nuai 12 la lut tling lo tan kum khatah Rs. 100 a ni ang a, sumdawnna lian deuh, kum khata cheng nuai 12 chin lalut tan license neih a ngai a, license fee hi kum khatah Rs. 2,000 a ni.
Hriattirna zawm lova license/registration nei lova ei leh in siam emaw zuar emaw an awm chuan dan angin hremna lekkawh theih a ni.
Post a Comment