Lawngtlai, November 04, 2021 : LADC Education & Human Resources Department thuchhuah angin November 1, 2021 atang khan LADC hnuaia Middle School leh Primary School zirlai ten an veng/khuaa VLTF te remtihnain sikul an kal tan.
Department ruahmannaa School kal tante hi hrikai tlemna, Lawngtlai khawpui pawn deuh vek an ni a, Lawngtlai khawpui chhungah chuan hrikai an la awm avangin School hi la tan theih a ni lo.
Primary lam hian LADC hnuaia Primary School zawng zawng School tan theih an tih laiin Middle lam chuan Lawngtlai khaw pawn lamah chauh School tan theih a ni an ti thung.
Primary School lam hi School tan an tam deuh zawk a, hriat theih chinah khawpui pawnah khaw 11 in School an tan. Lawngtlai khaw chhungah pawh Electric Vengah School hi kal tan a ni a, amaherawhchu veng chhungah hrikai an awm leh avangin School hi khar leh a ni. Primary lam hian Lawngtlai khawpui chhungah School tan turin hriattirna chhuah mahse veng tina VLTF te chuan an veng chhunga hrikai dinhmun enchungin an veng chhunga School la tan hi an la remti lo a ni.
Middle School pawh hi khaw pawnah chuan khaw 10 velin an tan a, mahse khaw thenkhatah hrikai an awm leh avangin School khar leh engemawzat a awm bawk.
Post a Comment