Lawngtlai, october 11, 2021 : Vawiin October 11, 2021 khan Pu Lalropuia Chinzah, EM i/c I&PR etc. chuan a office chamber-ah Lawngtlaia nitin chanchinbu chhuak thar tur Lawngtlai Today chu a tlangzarh a ni.
Chanchinbu tlangzarh inkhawm hi Pu ZD Dengngura, Editor Phawngpui Express chuan kaihhruaiin, Pu ZD Dengngura chuan, Lawngtlaiah hian chanchinbu (Print media) chhuak a la tlem em em a, hetianga thalai zawkte chanchinbu lama tuimi an lo chhuak zel hi a lawmawm hle a ni a ti.
Chanchinbu tlangzarhtu Pu Lalropuia Chinzah, EM i/c I&PR chuan, 'Chanchinbu hi tihtakzeta enkawl a ngai a, vawiina hun kan hmanna hian Lawngtlaiah chanchinbu hmasawnna kawngah kailawn thar a hawn ngei ka beisei' a ti a. Chanchinbu (Print media) hi kan rin ber leh thu kan lakna ber a ni a, a enkawlna kawngah kan fimkhur a ngai hle a ni a ti a. Khawtlang leh ram hmasawnna kawngah chanchinbu hi a pawimawh em em a, chutiang tur chuan rilru pawh kan sen a ngai a ni a ti bawk.
Pu Lalngheta Ralte, President, MJA Lawngtlai chuan, District dangah print media a zuih ral mek laiin, Lawngtlai District-ah print media chhuak thar a awm leh tur chu a lawmawm hle a ni a ti a. Chanchinbu mite hi mipui rawngbawltuah mi ten min ngai em tih hi chanchinbu mite pawh hian kan inenfiah a ngai hle a ni a ti. Kan sorkar hruaitute pawhin Lawngtlaia chanchinbu tihchhuahte pawh hi kan ngaihhlut a, kan ngaih pawimawh a ngai a ni a ni bawk.
Pu Elvis Lalthangzuala, Editor, Rauthla chuan, chanchinbu kan tichhuak a nih chuan a daih rei tur a ni a ti a, a enkawltute pawh party-ah nihna nei mahila, ram tana hnathawk kan nih angin lai takin chanchin thar kan buatsaih ṭhin tur a ni a ti bawk.
Chanchinbu tlangzarh tak, Lawngtlai Today neitu leh Editor ni bawk Pu H. Lalhmingmawia chuan, chanchinbu hlutna chang hria sorkar hruaitu kan neih a ṭul thu a sawi a, chanchinbu nena lengdun ṭhin chu mifing an ni ṭhin a ti. Lawngtlai Today a chhuah theihna tura puihtu zawng zawng chungah Pu H. Lalhmingmawia chuan lawmthu a sawi bawk a ni.
Post a Comment