Rauthla, October 16, 2021 : Lawngtlai mipui ten mask vuah kan inthlahdah leh tan ta niin a lang a, Dawr nghak leh Bazar a chawhmeh zuara thu thinte leh Office kai leh mipui nawlpuite zinga mask vuah lo hmuh tur an tam ta hle.
Sorkarin Mask vuah uar (All Mask Campaign) beihpui a thlak lai mek a ni a, mipui lam erawhin mask kan vuah uar lo tulh tulh mai. Health Minister Dr. R. Lalthangliana chuan October 11, 2021 khan October 21, 2021 thlenga hman tur Mask vuah uar beihpui thlakna campaign hi a hawng a. Dr. R. Lalthangliana chuan, 'zirchianna hrang hrangah a lan tawh bakah a takin (practically) mask vuah that hian min lo veng hle a ni tih kan hre tawh a, mask vuah that pawimawhzia hi chu kan hre vek tawhin a rinawm a, kan zawm tha hlei thei lo ni a a lan avangin tuna Campaign kan neih tur hian awmzia a neih ngei ka beisei a ni' a ti. Tin, inkhuahkhirhna hi sorkar hian a la kalpui reng a ni tih kan hriat a pawimawh hle a, Mizoram sorkar chuan inkhuahkhirhna hi October 30, 2021 thleng a pawtsei leh mek. Kan inthlahdul deuh avang hian hri hi a inthlahdul ve hauh lo a ni tih kan hriat a tha hle.
Mipui lamin nunphung pangngai zawh luih kan tum a, nimahse, kan hri hian nunphung pangngai zawh thei turin chance zau tak min la pe tlat lo. Total Lockdown leh inkhuahkhirhna hautak pui pui sorkarin a ruahman tawh lo. Mipui tana awlsam leh kan tihtheih ni tura langin inkhuahkhirhna pawh a siam chho mek a, chung zingah chuan mask vuah hi a tel a ni. Mipuite kan fimkhur loh a, awlsamtea kan tih theih mai mask vuah pawh kan paih loh chuan kan rin aia nasain hri hi a darh leh huk thei a ni.
Nimin khan Lawngtlai District-ah hrikai thar mi 11 hmuhchhuah a ni a, tun hma ai chuan a tlem hle. Lawngtlai leh a chhehvela hrikai kan tlakhniam deuh na chhan pawh hi in test kan tlem vang a ni a tih theih. Test si lo, hrikai hi kan vei suau suau maithei. Chuvang chuan mipui kan fimkhur zual zel a ngai a ni. Hnatlang thawhna hmun, chawhmeh zawrhna hmun, dawr leh office, mipui chet tamna hmun angah te Mask vuah lo hmuh tur kan tam sawt hle. Sorkar emaw VLTF lamin strick takin min vil reng hman lo, keimahni theuh hri laka kan himna chuan kan pawimawhna a lang dawn chauh a ni.
Post a Comment