Lawngtlai, October 25, 2021 : Lawngtlai District chhimlam leh khawthlang lam inkalpawhna chu thazawka siam turin Lawngtlai bawrhsap-in BRTF leh KMMTTP hnathawktute a hrilh.
Hun reitak chhung chu Lawngtlai atanga Diltlang paltlang, Parva kawnga Ngengpui kai lei chu motor ritphur tan zawh ngam a nih loh vangin, mipui chetvelna leh Buhfai thiarvelna thlengin harsatna a thleng thin a. Lawngtlai Bawrhsap Dr.Andrew H. Vanlaldika chuan BRTF hotute chu lei (Bridge) thar dawh zawh a nih hmain, lei hlui chu 407 Truck ritphurin a zawhtheih turin a theih ang anga thawmtha turin a hrilh a, BRTF hotute chuan kar tharah hian thawh nghal an tum thu Bawrhsap hi an hrilh a ni.
Lawngtlai Bawrhsap chuan Kaladan Multi Modal Transit Transport Project (KMMTTP) kawngpui, fur ruahsur vanga leimin tam tak chu thenfai mumal a nih loh vangin, he kawngpui sialhna thawktu Contractor te chu kawng thenfai hna ngai pawimawh hmasa turin a hrilh bawka, kawngsial hna viltu Mizoram PWD hotute pawh, mipuiin harsatna an tawh hrechiangtu an nih angin, Contractor te hnathawh uluk taka enpui turin a chah bawk.
Post a Comment