Sangau, September 28, 2021 : Myanmar ram buai avangin nitin Mizoram raltlan an lo luh belh zel a, nim thleng khan YLA Sub-Hqrs. Sangau huam chhunga raltlante hi an lo lut a ni.
Tun dinhmunah YLA Sub-Hqrs. Sangau huam chhung khaw 13 ah raltlan 987 an awm mek a, Sangau I ah 144, Sangau II ah 245, Sangau III ah 76, Sangau IV ah 165, Pangkhua-ah 111, Thaltlangah 90, Sentetfiangah 40, Lungtian I ah 62, Lungtian II ah 41, Vartekkaiah 4 an awm mek bawk. YLA Sub-Hqrs. Sangau huam chhungah hian Rawlbuk, Vartek leh Cheuralah te raltlan an la awm lo.
Myanmar raltlante awmna tur atan hian Pangkhua in Relief Camp an sa mek a, Sangau I, Sangau II, Sangau III leh Sangau IV te pawhin Relief Camp hi an sa tawh a, YLA Sub-Hqrs. Sangau pawhin chhungkaw 100 awm theihna tur Cheural Road, tawngtaina hmunah leh hmun dang pakhatah Relief Camp an busatsaih dawn bawk a ni.
YLA Sub-Hqrs. Sangau President Pu Lalduhthiama hnen atanga thudawn danin, raltlante hian mutbu, bungbel an mamawh ber a. Tin, khaw hrang hrangin Relief Camp an sakna tur atan chakrua hman mai tur Mau leh Silpauline an mamawh bawk a ni.
YLA Sub-Hqrs. Sangau huam chhunga raltlante hi Thantlang atanga lo kal an tam ber a, Mizorama lo lut lo, mahni khua tlansan a Thau, Bungtlang leh Siangkhan velah mi 6000 chuang an awm mek bawk.
Nimin khan raltlan hi mi 40 vel an lo luh belh leh bawk a ni.
Post a Comment