Tipa, September 28, 2021 : Siaha District Myanmar ramri depa awm khua Mawhrei leh Chapi a zirlaite Online Class kal dan a hmunah kalchilhin nimin khan Tipa SDO C Pu Lalhminglianan a enpui.
Mawhrei leh Chapi khuaah hian Airtel Tower awm mahse 2G Network chiah a awm avangin zirlai ten harsatna nasa tak an tawk mek a, Online Class kal turin khawchhung atanga km 3 vel lai a hla an kal a ngai thin a, chawlhbuk hi hmun 4 ah an mahniin an relchawp mai thin a ni.
Zirlai ten an harsatnate chu SDO (C) hnenah lo thlenin, network tha an mamawh thu leh an chawlhbuk khuhna tur Rangva an mamawh thute pawh an thlen bawk. Chapi zirlaite chuan an khuain an rin ber Myanmar Network Telenor chu tun hnaia signal an tihtawp tak avangin an khaw thenawm Mawhrei lama Online Class an kal chhunzawm a ngaiphah thu te sawiin, Mawhrei khua ten tlawmngaih leh duat taka lo mikhualin, Online Class kal tur hian tlanglamah an inpuchho thin a ni.
Pu Lalhmingliana chuan Network tha an neih theih nan theihtawp chhuahsak a tum thu leh an chawlhbuk khuhna tur Rangva ngaituahsak a tum thute sawiin, tun dinhmuna an mamawh zual phuhruk nan Silpaulin leh pawisafai cheng 2000 a pe hlawm a. He hunah hian Mawhrei khawtlang hruaitu VC tebakah MSO Sub-Hqrs, Mawhrei ten an tawiawm a ni.
Post a Comment