Tukinah (13.09.21) ka coffee in pahin WhatsApp group hrang2 a thuthar kan bih thuak thuak a, keinin thlamuang taka hun kan lo hman ral laiin, khawvel hmun hrang hrang leh Myanmar rama kan Unau duh tak, Zofate ngeiin manganna leh harsatna namenlo tawka tanpui an ngaih thute leh video clip thenkhat ka hmu nual a, chungah chuan Mizo mipuiten theihtawpa "Myanmar atanga nunau thlabar mangang, tanpuitu" ngai ngawih ngawihte an lo tanpui a, an lo dawnsawn dan te chuan mittui a ko hawin a tihnam thei a, lawmna thinlung tak neih avangin hnuk ulhin, mittui parawl teuhva chhiar leh en a awl duh hle! "Tuisik aiin thisen chu a chhah zawk a ni" an lo tih thin angin, khawvel hmun hrang hranga Zo chhul chhuak, Zofate ngeiin harsatna namenlo kan han tawh meuh chuan, hmangaihna vanga inkuangkuah duhin, tanpuina kut phar chhuakin, siruk lain thapui min thawhtirlo theilo a lo nih hi.

        India ram, Mizoram State, ar hmai tiat awrah Zofa/Mizo tlemte maktaduai 1.8 vel awrh chauh kan cheng a, India rama mihring tluklehdingawn (billion) 1.3 vel zingah chuan kan tlem tham hle mai. Mahse, ka Zo chhul chhuak, kan U leh nau, kan thisen zawmpui, Sakhaw pakhat (Kristianna) leh Culture thuhmun neitu, tawng thuhmun neitu hnam (ethinic group) dangte chu Mizoram State pawn lam India ram thoah leh Myanmar leh Bangladesh ramah "Then darh a, awp beh" mekin kan awm si a ni!

        Ka ngaihtuahna chuan Middle East ram te hrul vel nghakin Syria, Turkey leh Iraq rama Kurds/ Kurdish hnam, mi maktaduai 35 vel "then hran a, awp beh" meka awmte dinhmun te leh "Civil War" avang te leh an ram leh hnam dinhmun tha zawka an awm ve theihna tura beihna vanga hnam tam leh chak zawkte kut thak hnawih dan leh an tih dan te chu ka dawn vel chiam a! Hnam anga din chhuah theih loh leh mahni pianpui dikna (fundamental human rights) nei pha reng reng lova, he khawvela hnam anga lo awm ve hrehawm turzia te chuan rilru a ti vak thui hle. Zofate/Mizoten hruaitu tha, khawvel pawhin an thu leh hla/ thusawi an bengkhawn ve tlak neih hun ava nghah hlelhawmin, "Zofate inzawmkhawm" hun ava nghahhlelh awm thin tak em! Chutih rualin Zofate zingah ngei pawh, inpumkhat hlau leh duhlo niawm taka "Unau hmel hai" ang deuh boruak lo siam duhtu, chi bing boruak lo siam lui talh duhtute an awm palh ang tih a hlauhawm.

        India ram pumpui chu Hindu tam berna ram a ni a, Myanmar ram pawh Buddhist tam berna ram niin, Bangladesh pawh Muslim tam berna ram a ni. Chung Sakhaw upa leh tam zawkte karah chuan keini Zofate/Mizo te chu hnam tlem te ni mah ila, "Tlang chhipa khaw awm ang" deuhvin "Khawvel Eng" atan Pathianin Isua Krista kal tlangin, Tuipui rala Mingo hmangin Chanchin Tha min lo hrilh a, Zofa/Mizote tlang hrang hranga cheng reng rengte chu min awpbettu ram te Sakhaw (religion) vuantu kan awm ve lo. Mizote zingah Hindu, Buddhist leh Muslim kan awm ve miahlo te hi thilmak tak a ni!

        Kan chheh vela Tlangmi (tribal) dangte chu, han en vel ila, Sakhaw dang vuantu tam tak awmin, "Chanchin Tha" hrilh ngai hnam tam tak an la awm a ni. Zofate hi kan va lo vannei em! Tawng chungchangah pawh, a thumal leh thluk in anglo hlek hlek awm thin mahse, "Mizo tawng" a biak theih sawlh sawlh vek kan lo ni bawk.

        Tuna Mizoram State-a "Mizo tawng" a hman tlanglawn ber Lusei/Duhlian tawng chu han zir chiang ila, Mizo hnam peng tawng thumal (word) chi hrang hrang a lo tel treuh mai a! Hetianga Zofa hnam peng hrang hrangte tawng tlem tlem tel kimna "Mizo tawng" a lo awm hi a vanneih thlak hle. Chung Zofa hnam hrang hrang tawng thumal remkhawm tlem tlem te chuan, tuna "Mizo tawng" tia kan hriat lar ber chu a lo siam ta a ni. Ram dangah, Hnam dang zingah mahni hnam tawng nei tawhlo leh, mahnia Hawrawp hran nei tawhlo hnam (tribe) an awm nual. 

        Naga-ho chu hnam hlawm (tribe) 16 vel an awm a, an hnam pum (State pum) hman turin khaikhawmtu an nei ve lova, "Naga-mese" an tih, Assamese tawng/Vai tawng ang deuh roh inpawlh leh English an hmang daih mai a! Mizote kan vannei takzet. 

            Mizoram State-a cheng "Mizo" tia khawvelin hriat mek te chu State pawn leh ram dang atangin duhthusam tawk loh avangin selna anka awm thin mahsela, tun dinhmunah na na nachuan, hei hi kan phak tawk leh theihtawp a nih rih miau avangin, tun aia nasa leh chak zawnga thiltih theih leh hmalakna lian tham neih a harsa rih a ni. Chuvangin State dang, ram danga Zofa awm, Zo chhul chhuakte pawhin Mizoram mipuite hriatthiam chin neih a tha ang. Harsat manganna, thih lu ngama kan awm meuh chuan, Mizoram chu Zofate Inpui a nih angin, min lo tuamhlawma chhawmdawl turin kan tlu lut zel dawn a ni. 

            Tlinlohna, duhkhawplohna tam tak awm thin mahse, a tawp khawpah chuan Hindu pa, Buddhist pa, Muslim pa aiin Kristian pa-Mizo pa/ Zofate ngei chu kan inbel leh lo theilo a nih hi. Chuvangin inhmusit tawn a, insawisel kual a, in Sakhi hmuh mai lovin, Zofate kan nih ang ngeiin, hrui khat vuanin, hmalam pan turin i tangrualin, i thawkho zel teh ang u.

            Sakhaw (religion) leh Hnam ziarang (culture) leh tawng (language) in thuhmunlo lutuk te hi rei tak an tangrual mawh. In lungrual a, in hmangaih tawn a thawhote an harsat thin. Keini Zofate chu chhul khat chhuak ni satliah mai lovin, thlarau lama chhul khat chhuak, hrin khat kan ni. I tangrual zel ang u. "Tanrual hi chakna" a ni si a. 

-CT Lalrinawma

Post a Comment

Powered by Blogger.