Lungtian, September 11, 2021 : Myanmar sipai leh mipui sipai inkahna avangin Mizoramah raltlan an pung zel a. Lungtian khua, Lawngtlai District, Mizoram pawh Myanmar raltlante Relief Camp buatsaihin ni vawiin, September 11, 2021 khan khawtlang huap hnatlang an thawk.
Tarlan tawh angin Myanmar sawrkar sipai leh Myanmar Defence Force te nasa zawka an inkah leh tak avangin sahimna zawnga Mizorama lo lut an pung zel. A buai zual hma deuh khan mi 35 Lungtian khuaah hian an lut tawh a. Chhungkaw engemawzat lut tur in report tawh an awm. Vawiin hian Thantlang leh Sialam atanga lo lut tur chhungkaw 3 an awm a ni.
Myanmar atanga hian nitin lo lut tur an awm reng dawnin a lang ta. Tunlai hnaiah Covid-19 positive case tam tak Lungtian hian an neih avangin raltlante hi an lo lut ngam rih lo a ni Tunah hian Lungtianah hian Positive case hi a tlahniam zel a, mi 14 positive an la awm mek a ni. Hri hi chhutchah theih an in beisei tawh a ni.
Lungtianah hian raltlante chenna tur buaipui mek a ni a, YLA Hall (Vantura Hall) leh Tourist Lodge te chei that niin, vawiin khan hnatlang thawh a ni a, mi 100 chuangin hnatlang hi an thawk a ni.
Post a Comment