Lawngtlai 02.Sept,2021 : Nimin khan Andrew H. Vanlaldika kaihhruaina hnuaiah District thuneitute leh Lawngtlai khawpui chhunga Village Level Task Force hruaitute chu DC Conference Hall, Lawngtlaiah an thu khawm.
He meeting-ah hian Chairman Dr Andrew H. Vanlaldika chuan hri dona kawnga theih tawp chhuaha thawktu VLTF-te hnenah lawm thu sawiin, hri dona kawnga sawrkar kutke ber chu VLTF-te an nih angin theih tawp chhuah chhunzawm zel turin a sawm a ni.
Dr Andrew H. Vanlaldika chuan COVID-19 hri leng chu hmuh theih loh, a nihphung pawh zir chawp pah zel a nih avangin do dan thiam a har hle a. Chuti chung chung pawh chuan VLTF-te'n tha thlah lova sawrkar an tawiawm zel avangin Lawngtlai District pawhin harsatna lian tham a la tawk lo mai niin a lang, a ti a. Hri dona kawngah VLTF-te leh mipuite tawiawmna tel lo chuan sawrkar tan chet ngaihna a awm dawn lo va, sawrkar leh VLTF-te inkarah inhriat thiam tawnna leh lungrual taka thawh hona a awm chhunzawm zel a tul a ni tiin, Lawngtlai District tana hri dona kawnga theih tawp chhuaha thawhpui zel turin VLTF-te chu a ngen a ni.
He meeting-ah hian Lawngtlai khawpui chhunga VLTF ai awhte an tel kim hle a. COVID-19 hri leng dona kawnga chak zawka hma lak chhunzawm zel dan tur an sawi ho a ni.
Post a Comment