Rauthla 09.August,2021: Inrinni zan dar 7:30 khan Mizoram lo lut tur Motor, Lailapur hmun a misual ten an lo khawih chungchangah Joint Village Council Vairengte kaihhruaina in Vairengte khua a All NGO’s hruaitute inkohkhawm hmanhmawhthlak neihah kalkhawm te chuan resolution siamin Vairengte a hnathawk a awm mek, Lailapur mi leh sa te chu Pathiannia Vairengte chhuah san a, Lailapur a haw thla vek turin an hriattir laiin Lailapur lama let tur vai an awm lo.
Lailapur-a Mizoram mamawh phurtu lirthei te lo lambun a nih chungchangah Lailapur mipuite mawhphurtuah an ngaih thu Vairengte All NGO's te chuan an sawi a. Lirthei lambun a nih chungchangah Lailapur khaw mipui mawh phurtu an nih avangin Lailapur mistiri leh helper Vairengte a hna thawk thin te chu kumin chhung (i.e. 31 December 2021) thleng hian Vairengte chhungah inhlawh/chhawr an khap a, Vairengte mipuite pawhin thuchhuah zawm turin an hriattir nghal bawk.
Vairengte Jt.VC leh All NGO's meeting chuan, Mizoram leh Assam buaina chungchanga venhimna thawk tur a central sorkarin Central Police Force (CRPF) a rawn dah chu Mizoram tan hian a him tawk lo a, an aiah hian BSF dah turin sorkarin hma lak nise, an ti a. Inrinni tlai dar 3:30 a Silchar Mizoram House atanga Mizoram mamawh bungraw rawn phurtu escort tu ten an mawhphurhna an hlen zo lo a a zahthlak tiin an dem tak zet thu leh Escort Party te hi Assam sorkarin hremna na tak pek rawh se, an ti bawk.
Mizo driver te Venhimna a lema petu Assam sorkar chu mihring nunna pawh zah lova, NH306 kawngpui a essential commodities leh life savings medicine ni 12 chhung dangtu an nih piah lamah motor khaltutute thi thei dinhmun a dah duh tu anih avangin sorkarna enkawl zui tlakah an ngaih loh thu te, he sawrkar hi central sorkar hian thiatin, president rule ah dah rawh se, an ti bawk.
Vairengte mipui chuan Mizoram a kal tur bungrua phur Escort a kal tur an awm leh a nih chuan Assam Police hi hman tawh loh ni se, Central Force ngei hman ni tawh se tha an ti a. Silchar Liaison Officer (LO) kan thenawm te mizia hi hria in khaw en lai ngeiin Mizoram an rawn luh theih nan ruahmanna siam tawh rawh se, an ti bawk.
Inrinni zana Lailapur hmun a Lailapur mipuiten Mizoram bungraw phur an lo tihchhiat sak zawng zawng leh hliam tuarte hnenah Assam sawrkarin zangnadawmna pe rawh an ti. Lailapur huamchhungah Motor dan a awm leh chuan Lailapur khawtlang hruaitute leh mipuite mawhphurhnaah Vairengte mipuite chuan kan ngai dawn a, hetiang hi thleng nawn tawh lo turin Lailapur mipuite an hriattir.
Vairengte khawchhungah Lailapur mistiri leh sumdawngte kumin 2021 chhung lut rih lo turin an inhriattir a. In biakna an duh erawh chuan an Panchayat ten Vairengte khawtlang hruaitute an rawn be thei ang, an ti bawk.
Assam lamin an duh chen chen kawngpui NH 306 hi dang mahse Vairengte mipui leh khawtlang chuan harsatna an neih tur zawng zawng pawh chhel taka tuar kan huam a ni tih Mizoram mipui hriatah an puang a ni.
Post a Comment