Rauthla 09.August,2021 : Dr. John Zohmingthanga, ZMC Director chuan Covid-19thawhhnihnaah hian damlo an enkawlte leh nunna chan tate an bihchiannaah natna benvawn nei a bikin lung thalo, thisen sang, zunthlum, tar chak lote leh raipuarte an ngaihtuahawm bik niin a lang a ti. Hetiang miin Covid-19 hri an kai palh a nih a in lama an inenkawl an nih phei chuan uluk taka vil an ngai tih a sawi.
Dr.John-a chuan damlo ZMC a admit te, a bikin Home Isolation atanga ZMC a phurhte chu an thlen phei meuh chuan an chau hle tawh tlangpui thin a, hei vang hian in lama enkawltuten uluk taka kan vil an mamawh a ni, a ti bawk. Raipuarte hi nau neih hun tawhte leh natna langchhuak nasate chauh ZMC ah an admit thei tawh tih sawiin, natna lang chhuak lote chu CCC, CCCC leh Home Isolation lamah uluk taka lo inenkawl ni se a duh thu a sawi bawk a ni.
ZMC hotute chuan, "Sorkar leh khawtlangte kan tangrual viau chungin he hri hi kan dang seng tawh lova, nikum lamah chuan positive zawng zawng deuhthaw kan admit a tih theih a, kumin kum tir lam khan natna lang chhuak nasa lo kan admit tel thin a, tunah erawh chuan natna lang chhuak nasa leh damlo serious te chauh an lak tawh thu an sawi bawk.
Thawktute pawh chhun zan zawmin an buai a, sorkarin volunteers mi 150 vel min laksak bawk a, kan staff quarters te ti ruakin frontline workers ten an luah rih a ni," an ti. Thawktute an indaih lohna chhawk zangkhai turin sorkarin ruahmanna a siam mek nia an hriat thu sawiin lawm thu an sawi nghal a ni.
Post a Comment