Lawngtlai, August 20, 2021 : Vawiin August 20, 2021 khan Lawngtlai Area TKP Co-ordination Committee ten Blood donation calendar an siam bawhzuiin Thalai Kristian Pawl, Salem Unit Lawngtlai ten Lawngtlai District Blood Bank a dah tur thisen unit 16 an pe.
Blood Donation Camp neih hma hian inkhawmna hun tawi neih a ni a. Lawngtlai Area TKP Chairman Rbt. Elvis Lalthangzuala'n hun hmangin, TKP member te chu Kohhranah chauh ni lo khawtlang tan mi tangkai ni zel tura tan lak a ngaihthu a sawi a. Hri leng avangin rawngbawlna hrang hrang nei thei lo mah ila, thisen pek hi rawngbawlna peng pawimawh tak anih avangin LATKP in Blood Donation calendar a buatsaih chu Unit TKP hrang hrang ten kan ti thei zel chu lawmawm a tih thu sawiin, Thisen mamawhtu ten thisen thianghlim tak an dawn theihna turin kan nun uluk taka vawng ila. Krista leh Kohhran tan ti a, thisen pek rawngbawl chhunzawm zel turin TKP member te a sawm bawk a ni.
Vawiin Blood donation camp ah hian thisen Unit 16 la in mipa 12 leh hmeichhia 4 te an ni a. District Blood Bank, Lawngtlai a thawk ten BCM Salem Sunday Hall ah thisen hi an lak sak a ni.
TKP Salem Unit ten Blood Donation an neihnaah hian Rbt. Lalhriatpuia, MTKP Executive Committee member leh Pu Lalmuanpuia, Secretary LATKP te an tel thei bawk a. Kumin 2021 chhung hian Lawngtlai Area TKP te hian thisen Unit 178 an pe tawh a ni.
Post a Comment