Lawngtlai, August 26, 2021 : Vawiin August 26, 2021 khan Lai Autonomous District Council session neih a ni a. He session-ah hian thla riat leka upa Pu Manghmunga Chinzah kaihhruai LADC sorkar chu no confidence motion hmanga paithlak a ni. 



No Confidence Motion puluttu Pu Lallawmsanga Apetow chuan, hetianga ruling lam MDC ten no conficence motion an pulut chu pawi a tih thu a sawi a. Motion an put luh chhan lian ber chu Pu Manghmunga Chinzah sorkar hi langtlang sorkar a nih loh vang a ni a ti a. Pu Lallawmsanga chuan, 'sorkar hmasain election dawnah hna an la teuh a, hei hi kan sorkar chuan kan ti ve lo vang kan ti a, Executive Committee-ah EM leh MDC te pawhin MR lak zat a number-a insem mi 270 vel chu lak turin kan in ruahman a. Mahse, tuna sorkarin hna lak chu a nghet, contract leh MR te nen 500 chuang lak a ni' a ti a. Member ten kan CEM hi kan thawhpui thei lo a ti bawk. Pu Lallawmsanga Apetow chuan, 'thawhhona ṭha a ngai em em a, kan sorkarah hian hnalak te a lo awm ve a, chutah chuan member tam takte ngaihdan a ni lova, hna an lak zat a inan loh avangin member-te welfare a tichhe hle a ni' ti bawk. 


CEM Pu Manghmunga Chinzah chuan, sorkarna an siam tan lai vel leh Chairman thlan lai vel atangin MNF party chu a phir sa tawh a ni a ti a. CEM chuan, 'an sawi angin hna kan lak ka hre lo a ti a, hna kan lak zawng zawng hi 36 vel a ni a, mitthi aia lak 2 vel a awm bawk a. Hotupa ber ka nih angin mi 14 hna ka la a, 24 la anga min sawi hi in puh hming chhiatna a ni' a ti. CEM chuan sorkar a kaihhruai danah tihsual a neih a hriat loh thu a sawi a, a thawhpuite pawh duhsak loh bik a neih a hriat loh thu sawiin, a thawhpuite vuina hi a dik lo vek ka ti lova, tam tak hi chu a dik lo a ni a ti. 'Thil tihdik vek theih a ni lova, tihsual ka neih chuan ngaihdam ka dil a ni' CEM chuan a ti bawk. CEM chuan, he thil hi rei tak lo in up tawh, engtikni emaw lo thleng tur a ni tih hi kan ring tawh a. Mizoram lama party hruaitu ten inpaihthlak hi ti lo tura min tih angin hetiang thil hi a thlen ka beisei lova, mahse, party thu awi lovin hetiang hi a thleng ta a, keini chuan party zai ngai zela kal hi kan duh a ni a ti. CEM chuan hetiang hi party leh sorkar mualphona a ni a, ti lo hram turin ka duh a, thupha chawi tur a awm pawhin thupha chawi ka hreh lova, mahse, an awmnaah kalin ka sawi thei lo a ni' a ti. 


Vawiina sorkar rintawklohna motion buknaah hian motion support zawnga vote hi member 12 an ni a, motion kalh zawnga vote member 10 niin, neutral 1 a awm bawk. Chandmary Bialtu Independent MDC Dr. Lorrain Lalpekliana Chinzah leh Vawmbuk Bialtu, BJP ticket-a thlantlin Pu T. Zakunga ten no confidence motion puluttu te lamah ban pharin, South Lungpher Bialtu Congress MDC Pu C. Lalmuanthanga chuan ban a phar lo thung a ni. MDC 25 ah hian Covid-19 positive avanga enkawl mek Pu BN.Thangpuia tih loh chuan Session hi an attend theih vek a ni.


Pu V. Zirsanga, Chairman LADC chuan vote hmanga no confidence motion put luh chu buk a nih hnuah Executive dinglai chu dan hmangin paihthlak a ni tih a puang. Chairman chuan danin a sawi angin darkar 48 chhungin CEM thar thlan tur a ni a ti a, August 27, 2021 dar 2:00pm ah CEM thar hi thlan tur a ni dawn a ni. 

Post a Comment

Powered by Blogger.