Lawngtlai, August 27, 2021 : Nimin August 26, 2021 khan Lai Autonomous District Council Fur thutkhawm chu tan a ni a, nimin session-ah hian Chief Executive Member rintawklohna motion a luh avangin bussines dang khawih a ni lo.
Nimin sesssion-ah hian Pu Lallawmsanga Apetow chuan CEM Pu Manghmunga Chinzah kaihhruai sorkar an rintawklohna motion chu pulutin, Pu Manghmunga Chinzah an rintawklohna chhan a sawifiah. Pu Lallawmsanga Apetow chuan Motion an put luh chhan lian ber chu Pu Manghmunga Chinzah sorkar hi langtlang sorkar a nih loh vang a ni a ti a. Sorkar hnalak chungchangah thuneihna a inkhairual lo a ni a ti bawk. CEM Pu Manghmunga Chinzah chuan, sorkarna an siam tan lai vel leh Chairman thlan lai vel atangin MNF party chu a phir sa tawh a ni a ti a. CEM chuan, 'an sawi angin hna kan lak ka hre lo a ti a, hna kan lak zawng zawng hi 36 vel a ni a, mitthi aia lak 2 vel a awm bawk a. Hotupa ber ka nih angin mi 14 hna ka la a, 24 la anga min sawi hi in puh hming chhiatna a ni' a ti. CEM chuan sorkar a kaihhruai danah tihsual a neih a hriat loh thu a sawi a, a thawhpuite pawh duhsak loh bik a neih a hriat loh thu sawiin, a thawhpuite vuina hi a dik lo vek ka ti lova, tam tak hi chu a dik lo a ni a ti. Hemi hnu hian No Confidenrce Moition chu vote hmanga buk a ni a, motion support zawnga vote hi member 12 an ni a, motion kalh zawnga vote member 10 niin, neutral 1 a awm bawk. Pu V. Zirsanga, Chairman LADC chuan vote hmanga no confidence motion put luh chu buk a nih hnuah Executive dinglai chu dan hmangin paihthlak a ni tih a puang. Chiarman chuan August 27, 2021 ah CEM thar thlan tur a nih thu a sawi bawk.
Vawiin dar 2:00pm khan session hi neih chhunzawm leh tura tih a ni a, ruahman dan chuan vawiin session-ah hian CEM thar thlan tur a ni. Chairman atana ruat lailawk Pu VL. Hmuaka member thenkhatte chu session tan hunah a thlen hman loh avangin Pu Manghmunga Chinzah chuan, dar 2:00pm a session tan tur a nih laiin 2:10pm ah pawh session tan a nih loh avangin dan ang takin an CEM Candidate Dr. Lorrain Lalpekliana Chinzah chu uncontest-in CEM ah a tlin thu a sawi. Chairman atana ruat lailawk Pu VL. Hmuaka lo luh hnuin, Pu Manghmunga Chinzah chuan, hetia session tan huna tan a nih loh avang hian CEM thlan chu tih lo ni mai se tiin a sawi a, session chu an hriatpui theih loh thu a sawi. Hemi hnu hian Chairman-in a tlai chhan te sawiin, member-te hnenah ngaihdam a dil a. Dan angin session chu kaltlangpui a nih tur thu sawiin, session chu kaltlangpui a ni. Hemi hnu hian CEM nomination file tu pakhat Dr. Lorrain Lalpekliana Chinzah chuan session chu an boycott thu a sawi a, house an chhuah san nghal a ni.
Hemi hnu hian Chairman atan a ruat lailawk Pu VL. Hmuaka chuan Nomination file tu pakhat Dr. Lorrain Lalpekliana Chinzah chu a awm tak loh a avang leh a propose-tu leh seconder an awm tak loh avangin nomination file-tu pakhat Pu V. Zirsanga chu chuhtu awm lovin Chief Executive Member, LADC a thlan a nih thu a puang.
Post a Comment