Lawngtlai 3rd.Aug,2021 : Myanmar sipai sawrkar-ah chuan State Administration Council siamthat (reformed) a ni a, ‘Caretaker Government of Myanmar’ tia vuah a ni a, Military Council hotuber, senior General Min Aung Hlaing chuan Prime Minister invuahin a hruai a ni. Pathianni khan television-ah thu sawiin Gen.Hlaing chuan kum 2023-ah Myanmar inthlanpui buatsaih a tiam a. Myanmar chungchanga ASEAN-in palai (regional envoy) a ruat apiang thawhpui tura a inpeih thu a sawi. (rauthlanews.com)
Gen.Hlaing chu February ni 1, 2021-a Myanmar-a mipui thlan sawrkar State Counsellor Aung San Suu Kyi paihthlatu sipaite hotu a ni a, civil sawrkar paihthlak kha November ni 8, 2020 Myanmar inthlanpuia Parlliament member thlan tharte inkhawm dawn ni a ni a, a tuk February ni 2 kha an inkhawm ni tur a ni. Khata tang khan Myanmar chu State Administration Council chuan a kalpui ta a ni.
Pathiannia television-a thu a sawiah chuan Gen.Hlaing chuan August 2023-ah Myanmar inthlanpui neih a ni ang a ti a, chumi ang chuan State of Emergency dan angin democracy leh federalism-a innghat Myanmar sawrkar din a ni ang a ti.
Hetih lai hian ASEAN Foreign Minister-te chu tun thla ni 2 atanga ni 7 inkar chhungin an inkhawm ang a, Myanmar sipai sawrkar leh a eptu (opponent) te nena inbiakna nei turin ‘special envoy’ an ruat dawn a ni. April thla khan an lo inkhawm tawh a, Myanmar-a tharum thawhna chu bansan thuai ni se, special envoy chuan Myanmar tlawh se an ti a ni.
February thla atang khan Myanmarah chuan sipai sawrkar duh loh lantirna (regular protests) a awm reng a, human rights watchdog Assistance Association for Political Prisoners (AAPP) chuan tharum thawhnaah chuan mi 940 an thi tawh a, sipai sawrkar duh lohna lantirtu mi 6,994 man an ni a ti.
Post a Comment