Lawngtlai 3rd.August, 2021 : Joint Action Committee on Inner Line Reserved Forest Demand chuan Mizoram leh Assam inkar boruak a thlir reng tih sawiin Assam lam chet dan chu lungawi har a tiin a duh lo tak zet.
Nimin khan press release chhuahin JAC on ILRFDC chuan “Assam Chief Minister-in Mizoram chak lak luhna kawngpui a dang leh rel kawng tihchhiat mai pawh duh tawk lova damlo enkawlna tur damdawi thleng thlenga min hrek sak duh hi” an ti a, an ngaithiam lovin an lungawi lo takzet tih an sawi. He thil hian inremna aiin Mizo mipui thinrimna leh state pahnih inkara inhmuhthiam lohna bak a thlen dawn lo an ti a, Assam CM Himanta Biswas Sarma chu a rangthei ang bera kawngpui hawng a, an thil tih dik lohah ngaihdam dil nghal turin an hriattir.
JAC on ILRFDC chuan “Mizoram leh mipuite chak lak luhna ber dan lo ang a an dan lai leh rel kawng tichhiaa damlo te hman tur damdawi thlenga min hrek sak laia Central sawrkar Pu Narendra Modi leh Home Minister Pu Amit Shah ten engmah khakna leh an tih dik loha Action lak tumna an nei lo hi” tiin mak an tih leh an hriatthiam loh hle thu an sawi. “Mizoram leh Mizo mipuite hi India constitution leh inkaihhruaina hnuaiah hian khua leh tui kan ni ta lo em ni” tiin President leh Prime Minister an zawt.
JAC on ILRFDC chuan “India khua leh tuia min la ngai a nih chuan Assam Chief Minister Himanta Biswas Sarma thil tih dan hi thu leh awm loa titawp a, hremna pe ngei turin” an ngenin an hriattir a, “Kan ram dik tak 1875 boundary anga min pe a a chhung a dan lo ang a cheng Bang- ladeshi te hnawt chhuak nghal turin” an Prime Minister chu an ngen a, an hriattir nghawl bawk.
“Mizoram leh Mizo mipuite chu khawngaiha mahni pawl leh mimal ngaihdan te sawia pho lang mai mai lo turin” JAC on ILRFDC chuan an ngenin an hriattir bawk a. “1875 ramri bak hi ramri dang kan nei loin kan pawm lo a ni tih kan inhriattir nghal a, chutih rualin media velah thuthang diklo leh video clip te post a, thehdarh lo turin kan inngenin kan in hriattir tak meuh meuh a ni an ti. Sawrkar leh JAC thu lo ngaichang hram hram turin an sawm a, “Kan tanrual a thukhat kan vuak tlan chuan kan Pathian zarah hnehna kan chang ngei ang” an ti.
“Mizoram sawrkarin kan ram leh hnam him nana Assam Police danga kut hial a thawh hi JAC chuan lawmawm a tiin, a tawp thlengin JAC chuan sawrkar a thlawp tlat dawn a, tunhnu zelah pawh kan ram dik tak 1875 dinpui a tawlh miah lo turin kan ngen a, 1875 humhim tura a hmalaknaah JAC chuan a tawp thlengin sawrkar a thlawp dawn a, mipui pawhin sawrkar sel mai lo a thlawp tlat turin kan in sawm a ni” JAC on ILRFDC chuan an ti.
Post a Comment