Lawngtlai 18.August,2021 : Mizoram Legislative Assembly chuan Tuirial Assembly Constituency bialtu MLA Pu Andrew H. Thangliana a ui takzet a, a boral chu hun lo a tiin ram leh hnam tana hna a lo thawhte a ngaihluin a chhuang hle.
Pu Andrew H.Thangliana chu nimin zing dar 6:35 khan Ebenezer Hospital, Aizawl-ah a boral a, kum 44 mi a ni a, a nupui leh a fate pathum a kalsan. Mizoram Assembly chuan sunna thu chhuahin Pu Andrew H. Thangliana chu Zoram People's Movement (ZPM) zawmin kum 2018 khan 4- Tuirial Constituency atangin Independent ticket-in MLA a thlantlin a ni a ti. Pu Andrew H.Thangliana boral chu political party hrang hrangin thu chhuahin an ui thu an sawi.
MNF chuan Pu Andrew H.Thangliana chuan ‘min boralsan ta mai’ tiin a hun lo a tiin, pawi a ti takzet a, thinlung takin a sun tih a sawi a. MLA-puiten an uiin an sun hlawm hle a, amah thlahliamnaah pawh Chief Minister, Speaker, Minister, MLA leh MNF hotute thahnem tak an tel a ni a ti.
Mizoram Congress (MPCC) chuan Pu Adrew H.Lalthangliana chu Mizoram hruaitu, hmabak duhawm tak nei a ni tiin a boral chu hun lo an ti a. Pawi an tih leh an ui tak zet thu an sawi. Ram tan channa nasa tak a ni an ti.
ZPM chuan Pu Andrew H. Thangliana chuan “min boralsan” tiin pawi an tiin an sun tak meuh meuh tih an sawi a. ZPM Party tan channa nasa tak a ni a, a hmun ruak hnawhkhah hi a har dawn hle a ni” an ti.
“Thalai viak tha leh taima, Mizoram leh a bial hmasawnna tura theihtawp chhuahtu, rethei leh tanpui ngaite tana inpe zo em a ni” an ti a. “Tuirial bial mai ni lo, Mizoram tan channa nasa tak a ni a, a duh leh tum angin hna thawk hman lo mah se a sulhnu zawng zawngte kan theihnghlih tawh dawn lova, kan thinglungah a nung reng tawh ang” an ti.
BJP Mizoram Pradesh chuan Pu Andrew H.Thangliana chu “Thalai duhawm tak kan chan ta mai”tiin a pawi an tih thu an sawi a. “A bial tana a inpek nate a hluin hetiang mi taima leh inpe mahni bial leh Mizoram hmangaihtu kan chan ta mai hi a pawi kan ti tak zet a ni” an ti.
PC Party chuan an uiin an sun takzet tih an sawi a, ram leh hnam tan a sur a sa hnuaia thawk rim thin, a bial mipui leh mi rethei chanhaite hmangaih leh suhsak taka awm thin a ni an ti a.”Tuirial mipuileh kan ram leh hnam tan channa nasa tak a ni a, a bial chhung leh ram rana hmasawnna hna a thawh zawng zawngte Zofate thinlungah a nung reng tawh ang” an ti.
Party tinte chuan a bial mipui, a nupui Pi H. Lalromawii leh an fate, chhungkhat lainate an tawrhpui thu an sawi a, Pathianin awmpuiin thlamuan se an duh thu an sawi.
Post a Comment