Lawngtlai, August 18, 2021 : Lawngtlai khawpui leh a chhehvel khuaa Covid-19 hrikaite enkawlna, Thingkah IR hmuna Covid Care Centre chu tun dinhmunah a tawt ṭan mek a, hrikai tharte a dah theih loh thuai dawn.
Thingkah hmuna Covid Care Centre atan hian IR Main Building leh Quarter hman mek a ni a, tun dinhmunah Main Building ah hian hri kai mi 74 awmin, Quarter-ah hian mi 71 an awm mek bawk. Heng building pahnihahte hian hrikai mi 4 ve ve chiah a dah theih tawh thu thawktute chuan an sawi.
Hemi chungchangah hian Dr. LP. Malsawma, CMO, Lawngtlai chuan, CCC a tawt ṭan tawh avang hian hrikai tharte chu Home Isolation-a enkawl tura tih mai a ngai tawh a ti a, symptom neite erawh CCC ah a theih anga dah an ni ang a ti a. A ṭhat dan berah chuan veng tinin 4C nei thei sela duhthusam a ni a ti.
Dr. Andrew H. Vanlaldika, Deputy Commissioner, Lawngtlai chuan, Lawngtlaiah hrikai kan la tlakhniam theih loh thu leh hrikaite dahna sorkarin a ruahman chu tun dinhmunah a tawt tan niin a sawi a. Hetiang zela kan kal a nih chuan hrikai hmuhchhuah tharte hi mahni veng theuhah Home Isolation a enkawl chhunzawm mai an ngai dawn niin a sawi. DC chuan hmundangah Covid Care Centre hmun tur an dap reng tih sawiin, tun dinhmunah chuan hmun a awm loh thu a sawi a. Veng tin ten 4C din thei nisela duhthusam a nih thu a sawi bawk. Veng tinin 4C an dinna turah hian a hmun chungchangah harsatna an nei tih a hriatpui thu a sawi a, hemi kawngah hian VLTF leh Kohhrante pawh kan tan tlan a ngai hle a ni a ti a. 4C hi kan din thei a nih chuan sorkar pawh a tlanchhe dawn lo a ni a ti.
Dr. Andrew H. Vanlaldika, Deputy Commissioner, Lawngtlai chuan veng tinte hnenah 4C din tur hian ngenna pek chhuah vek tawh a nih thu a sawi a, hemi chungchang leh hrikaite dahna zel tur chungchang hi naktuk lamah sawiho a ni ang a ti bawk. DC chuan mipuite ngaihtuahin inkaihhruaina pawh thlahdul a ni a, mipuite pawhin sorkar thu kan zawm ve a tul a ni a ti a. Lohtheih lova pawn kan chhuah pawhin inkarhlata awm leh mask vuah chu kan thuvawn nise a duh thu a sawi bawk.
DC chuan vengt inin 4C kan lo din thei a nih pawhin chhungkaw tinte sum thawh kawngah leh hmalakna hrang hranga kan tan tlan a ngai tih a sawi a, hri hian kan chhungkua min luhchilh thei theuh a ni tih hria a, hrikaite enkawlna lamah chhungkaw tinte tan la lehzual turin a ngen bawk a ni.
Post a Comment