NH 306 dan pin chu thil tha lo tak a ni a, mihring puite dikna leh chanvo hnualsuatna a ni - Larsap
Aizawl, August 13, 2021 : Governor Brig. (Dr) B.D. Mishra (Retd) chuan nimin khan Mizoram sawrkar hmalakna pawimawh deuh te belchiang turin Home Department, Health Department leh Public Works Department hotulian te Raj Bhavan-ah a kawm.
Heng department aiawh te hian an hmalakna pawimawh zual te sawi na hun an hmang a ni. Governor Brig. (Dr) B.D. Mishra leh official te inkawmnaah hian Mizoram leh Assam ramri buai chungchanga Mizoram sawrkar dinna, hmalakna kal mek leh hmachhawp te ngaihthlak a ni a. Covid-19 hrileng dona kawnga Mizoram sawrkar hmalakna kal mek te, Kaladan Multi-Modal Transit Transport Project chungchang te sawiho a ni.
Governor chuan Ramri buaina chungchang pawh ralkhat atanga a lo hriat aia a chian thar sawt thu sawiin buaina chinfel kawng chu silaimu hmetpuak tawh miah loa boruak muanawm tak nen zawh a tul hmasa a ni a ti. Governor chuan ramri hrula district thuneitute hi state pahnih karah boruak muanawm a awm theih nan an inthian that a ngai a, nitin emaw a theih anga zingin an in biak tawna, chanchin an in hrilh reng a tul a. Forest Official te pawh Police hruaia ramri buai lai an tlawh loh a ngai bawk a ni a ti.
Covid-19 hrileng dona kawngah Mizoram Sawrkar a che tha tawka a hriat thu a sawi a. Covid 19 Hrileng dona kawnga fimkhurna mipui hnena nasa zawka zirtir kawngah te tha thlah lova tangmar pat turin a chah a ni.
Governor Brig. (Dr) B.D. Mishra (Retd) chuan ramri buaina avanga Mizoram mamawh lakluhna kawngpui- National Highway 306 (NH 306) dan pin a ni thin chu thil tha lo tak, mihring puite dikna leh chanvo hnualsuatna a ni a ti a. He harsatna chinfel dan awlsam ber chu Kaladan Multi-Modal Transit Transport Project (KMMTTP) a rang thei ang bera siam zawh a ni a ti. Governor chuan PWD hotute chu he project pawimawh tak chak zawka thawk tur leh project hnathawhna tur sum tang mek pawh nawrchhuah a nih theih nan Central sawrkar nawr turin a chah a. A tul chuan Mizoram Governor a nihna ang pawhin Central Sawrkar dawr a inhuam thu a sawi bawk a ni. Tunah chuan NH 306 hi Mizoram nunna hnar a ni rih a, mahse; KMMTTP siam zawh a nih hun chuan Mizoram tan nitin mamawh leh bungraw chawkluhna kawngpui zau zawk leh awlsam zawk a awm dawn tih a sawi.
Post a Comment