Khawvel a domestic football league ngaihhlut hlawh ber 2021-2022 season Premier League chu zanin atangin tan a ni dawn a, ruahman ang chuan May 22. 2022 ah khar a ni ang.
England ah 1888 atangin 1st division hoten Football League First Division ti a vuahin an khel tan a. Kum 1992-93 season atangin a kal phung her danglamin Premier League ti a vuah a ni a, team 20 in an khel thin a ni. English Football hian kal phung fel tak neiin season tawp a, a mawngphah 3 te league hniam zawk The Championship ah an tla thla a, The Championship atangin a sang 3 te Premier League ah an chho ve thung a, chutiang chuan season tin an inbanlek thin a ni.
2021-2022 Premier League hi Premier League season 30 an khelhna a tur a ni a, chakin point 3, inhneh in point 1 insemin Club 20 ten match 38 theuh an khel ang. Tun sason ah hian a goal leh goal loh tichiang turin Vedio Assistant Referee (VAR) hman a ni leh ang. Season hmasa a division hnuai lam The Championship a chhuk Norwich City leh Watford te chu Premier league ah an kir leh dawn a.
Anni bakah hian a vawi khatna atan Brentford chuan Premier League an khel ang, Brentford manager Thomas Frank chuan Premier Club te chu an beisei loh taka an barakhaih (surprise) dawn thu leh season liamta a goal 31 zet thuntu an striker Ivan Toney dang thei an awm a rinloh thu a sawi. Season liam ta a an tih ang bawkin inkhel tan dawn ah vunrawng leh chi inthliarna duhloh entir nan, mual laiah khup pakhat in an thingthi leh ang.
Premier League khel tur Club 20 ah hian London atangin Club paruk, Arsenal, Brentford, Chelsea, Chrystal Palace, Tottenham Hotspur leh West Ham Utd te an awm a. Manchester atangin Manchester City leh Manchester Utd awmin, Liverpool atangin Everton leh Liverpool te an awm bawk a ni.
Premier League hian ngaihhlut a hlawhin TV atangin 4.7 billion, khawvel mipui zat ve aia tam daihin an thlir thin a ni. (2021 ah khawvel mipui hi 7.9 billion kan ni)
Premier Leage ah hian sum atamin 2019-2020 season a Club lian 5 ten kum khat ah chawhrual in mipakhat hlawh atan a an sen pawh a tu ru hle, player 30 chhawr Man-City in 8.73 $ million dollar, Man Utd -7.66, Liverpool- 6.92, Arsenal – 5.99, Chelsea – 5.97 a ni.
2020-2021 Season a an pawisa lakluh pawh a hraw hle bawk a:- Man City – 38 = 153 $ million. Man City hian Champion manah 38 $ million bakah TV, gate money etc atangin a vaiin $ million 153 an la lut a.Man Utd -36 = 148, Liverpool – 34 = 151, Chelsea – 32 = 143, Leicester -30 = 132.
Tun season ah hian Club hrang hrangah player lut leh chhuak an awm nual a, Aug 13 thlenga player manto top 5 te chu:-
1. Jack Grealish, Man City 100 pound million (Hei hi British record a ni)
2. Romelu Lukaku 97.5 pound million
3. Jadon Sancho, Man Utd 73 pound million
4. Ben White, Arsenal, pound 50 million
5. Cristian Romero, Tottenham Hotspur, pound 47 million
2021-22 season Premier League inkhel hmasa ber chu zanin, Aug 13. zanlai dar 12:30 ah London Club pahnih in an khelh dawn a, hming lem a The Bees ti a an vuah Brentford chuan seat 17,250 awmna Brentford Community Stadium ah Arsenal a mikhual ang. Naktuk, inrinni tlai dar 5:00 ah Man Utd v Leeds, 7:30 ah Leicester v Wolves, Chelsea v C.Palace, Watford v Aston Villa, Everton v Southampton, Burnley v Brighton, dar 10:00 ah Norwich City v Liverpool, Pathianni tlai dar 6:30 ah Newcastle v West Ham, dar 9:00 ah Tottenham v Man City ten an khel ang.
Post a Comment