Lawngtlai 3rd.August,2021 : Nimina Siaha-a NGO leh All Political Party-te inkhawm Chief Executive Member (CEM), Mara Autonmous District Council-in a koh chuan nikuma Mizoram sawrkarin protocol list/warrant/order of precedence a chhuaha lungawi lohna Mara Autonomous District Council-in Chief Minister hnena a thlen chu siamlhat leh a nih thuai tur thu dawn a nih hnuah tun thlengin siamthat a la ni lo an ti a, August ni 15, 2021 hma ngeia siamtha turin Chief Minister hnenah ngen leh ni se, a tul chuan palai pawh intirh ni se, an ti a, a hlawhtlin hma chuan hma lak chhoh zel ni se an ti.
Nikuma ‘Order of precedene’ Mizoram sawrkarin a siamah chuan District Council chu Main Warrant-a tel loh a ni bakah Autonomous District Council CEM, Chairman leh Members of District Council te dinhmun tihlan a ni lo a. North East-a state ten Sixth Schedule hnuai ADC te dinhmun sang taka a dah laia, Mizoram chhunga District Council te dinhmun chiang nial lova dah chu inzah lohna lian takah an ngaiin nikum Independence Day leh Republic Day 2021 pawh a hrana hman a lo ni tawh a ni an ti.
Nimina inkhawmah chuan Mara Thyutlia Py (MTP) General Headquarters, Mara Students’ Organisation (MSO) General Headquarters, Mara Chano Py (MCHP) General Headquarters aiawh te leh Siaha District-a Indian National Congress (INC), Mizo National Front (MNF) leh Bharatiya Janata Party (BJP) aiawh te bakah Chairman (MADC), Opposition Leader (MADC) leh Executive Members (MADC) te an tel a ni.
Post a Comment