Rauthla, August 17, 2021 : Medical Operational Team on COVID-19 (MOT) member-te chuan Covid-19 hrilengin min kiam san hun tur a hriatlova, zawi zawia nunphung pangngai a kan kir a ngaih avangin mipuiten Covid-19 nena chen ho kan zir a tul takzet a ni tiin invenna hmanrua tha ber chu mitinin kan tih theih vek Covid Appropriate Behavior (CAB) zawm hi a ni, an ti.
MOT te chuan hri kai enkawlna atanga an chhuah tir danah him lo a awm lo tih an sawi a. Covid-19 symptom lan hma ni 2 leh symptom lan chhuah hnu ni 5 chhung hi midang kai chhawn theih hun lai a nih thu MOT member te chuan an sawi a. Symptom lan chhuah atanga ni 5 hnuah chuan kan taksa a natna do tu (neutralizing antibodies) a rawn tam a, chu chuan virus rawn beiin viral load chu a tla hniam a ni. Tuna kan discharge protocol hman mek hi a him tawk thu leh WHO, ICMR leh CDC-te pawhin hetiang ang inkaihhruaina hi an pawm thu MOT member te chuan an sawi a ni.
Medical Operational Team on COVID-19 (MOT)-te hian an Chairman Dr. Z.R. Thiamsanga hovin Lunglei District-a Covid-19 hrileng dinhmun tlangpui leh a do let kawnga hmalakna kal mek leh hmalak tul te zirchiangin Lunglei an tlawh a ni. Hemi chungchangah hian Lunglei District MLA thenkhat te leh District Level Task Force on Covid-19-te nen Lunglei DC Conference Hall-ah thutkhawmna hun an hmang.
Post a Comment