August 16, 2021 zanlai thlengin Lawngtlaiah Partial Lockdown kalpui a ni dawn

Lawngtlai, August 9, 2021 : Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin vawiin khan Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga ni 16.08.2021 zanlai dar 12:00 thlenga inkhuahkhirhna kalpui dan tur an rel.

Lawngtlai DLTF thu khawm chuan Lawngtlai District chhungah ei leh bar leh mipui khawsak kawngah harsatna a awm loh nan awmze neia inthlahdul chungin, uluk leh fimkhur taka inkhuahkhirhna la kalpui a tul nia hriain, Lawngtlai khawpui chhungah August ni 16, 2021 zanlai thleng partial lockdown kalpui an rel a. District chhung hmun dangah chuan Mizoram sawrkarin inkaihhruaina a chhuah zulzuiin inkhuahkhirhna kalpui a ni ang a, sub-division-ah te chuan a tul dan azirin SDO (C) kaihhruaina hnuaiah inkhuahkhirhna kalpui dan tur hi rel a ni ang.

Lawngtlai khawpui chhunga partial lockdown kalpui chhung hian dawr zawng zawng chu Pathianni tih lohvah chuan ni tin zing dar 6:00 atanga tlai dar 3:00 thleng hawn a ni ang a. Khawpui chhunga veng 12 chu zone 3-ah thenin, a ni inchhawkin an in-bazar chhawk ang a. Khawpui pawn atanga Lawngtlaia bazar turte chu VLTF hriatpuinain khaw khat atangin mi panga (5) aia tam lo an bazar thei ang.

Hemi chhung hian lirthei chu a registration number azirin number kawp kim leh kawp kim lo (odd-even) angin intlan chhawk tur a ni dawn a. Intlan chhawk dan tur ruahmanna kimchang chu Police lam leh SDO (S)-in an siam dawn a ni.

Hemi hun chhung hian sawrkar leh kohhran office te chu mi 5 aia tam lovin kai phawt ni se, tih a ni a. Hma sawnna hna leh hna tul dang chu hmun khatah mi 5 aia tam lovin thawh theih a ni bawk ang.

Hemi inkhuahkhirhna hman hun chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tur a ni bawk.

Hemi hun chhung hian COVID-19 hri leng laka himna tur SOP (Standard Operating Procedure) leh CAB (Covid Appropriate Behaviour) te chu tha taka zawm tur a ni ang a. Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.