Rauthla 4th August.2021 :Mizoram leh Assam ram inkara boruak muanawm a awm theihna turin Assam minister pahnihin naktuk ningani khian Aizawl rawn tlawh an tum a, ruahmanna siamchhoh mek a ni.

Mizoram Chief Minister pisa atanga thudawn danin Assam minister pahnihin Aizawl an rawn tlawh tur chungchangah hian Assam sorkar leh Mizoram Chief Minister pisa te an in be pawp tawn reng a. Ruahmanna tluang taka siam chhoh mek a ni, an ti.

Atul Bora & Ashok Singhal


Thawhtanni tlai dar 4:25 khan Chief Minister Zoramthanga chuan ramria buaina chhuakah boruak muanawm tak a awm theih nan harsatna chinfel a nih theihna tur leh mipuite harsatna chinfel a nih theihna turin Mizoram police te chu July, 26 a FIR thehluh hnuklet turin thu a pe tih twiter ah a lo tarlang tawh a. Hemi chhan let nan hian Assam Chief minister hian Assam police te hnenah Kolasib DC leh Vairengte SDPO te laka thubuai an ziah luh hnuklet turin a hriattir ve nghal tih leh, Assam minister pahnih Agriculture minister, Atul Bora leh Housing & Urban Minister Ashok Singhal te chu ningani ah Aizawlah a tirh tur thu a thawhtanni zan dar 7:15 khan twiter ah atarlang a ziak zui ve leh a. Hemi hmalam hian Assam Chief minister laka thubuai ziahluh leh Mizoram Rajya Sabha MP K.Vanlalvena laka thubuai ziahluhte chu te hnuhlet an lo remti ve ve tawh bawk a ni. 

Hetih mek lai hian July, 26 a Vairengte dai Rickshaw Stand-a inkahna a thlen hnuah Assam lamin Mizorama lut tur lirthei, National Highway 306-a an dan chu eng chi mah ala lut lova. Tun thlengin mihring phur khualzin leh bungraw phur khualzin motor Mizoram lama lut ala awm lo a ni.

Kolasib SP, Pu Vanlalfaka, Vairengte hmun thutchilhtu chuan, Assam lam atanga Mizorama lut tur Motor eng chi mah, sipai motor tih loh chu lut engmah ala awm loh thu a sawi a. He tih mek lai hian Mizoram lam chuan lirthei tlantlang duh a piang chu Assam lamah an chhuah thla zel thung a ni.

Post a Comment

Powered by Blogger.