India rit chawi chak Mirabai Chanu chuan Tokyo Olympics-ah silver medal a la a, tun tumah chuan India tana medal la hmasa ber a ni.
Mirabai Chanu hi Manipur State a awm a ni a. An State Chief Minister Pu Biren chuan, Mirabai Chanu chu lawmpuina thu thawn in, cheng vbch 1 an pek tur thu a pung bawk a ni.
Mirabai Chanu hi 49kg category-ah a tel a, Olympic hrim hrimah weighlifting huanga India in medal a lak vawi hnihna niin, 2000 Sydney Olympics-ah khan Karnam Malleswari chuan bronze medal a lo la tawh bawk a, Mirabai Chanu hi weightlifter zinga Olympic medal la thei hmasa ber dawttu a ni a. Hei bakah hian India tana 1900 atanga 2021 thlenga mi mal zinga Olympic medal la thei 17-na chiah a ni bawk.
Rio Olympics 2016 ah khan Mirabai Chanu chu a che tha teh chiam lo hle a, clean and jerk intihsiaknaah felfai taka chawi a nei miah lo a. Tokyo khawpuiah erawh nasa takin a danglam a, pahnihna a ni thei a, India chuan medal a lak ve theih phah a ni.
Tokyo khawpuia finalah Mirabai Chanu chuan snatch event-ah 84kg leh 87kg te chu a chawi thei a. Clean and jerk event-ah pawh 110kg leh 115kg te a chawi leh a, snatch leh clean and jerk lama a chawi rih berte chu an belh khawm a, 202kg niin pahnihna hi a ni thei a. Pakhatna ni ta Chinese mi Hou Zhihui (210kg) chu 8kg in a pha ta lo a. Pakhatna Hou Zhihui chuan Olympic record thar a siam nghe nghe.
Pahnihna a nih hian Mirabai Chanu chuan, “Olympic medal dawng thei han nih chu a lawmawm khawp mai a, duhthusam ang takin thil a thleng a ni ber a. He medal hi kan ram tan ka hlan a, ka tana tawngtai thin India ram mipui zawng zawngte chungah lawmthu ka sawi a. A bik takin ka chhungte hnenah lawmthu ka sawi a, ka tana ka nu inpekna hi theihnghilh theih a ni lo,” a ti.
“Min thlawptu kan sorkar hnenah lawmthu ka sawi a, Ministry of Sports, SAI, IOA, Weightlifting Federation of India, Railways, OGQ te bakah sponsor zawng zawngte leh IOS te hnenah lawmthu ka sawi a ni,” a ti.
2017 world champion Mirabai Chanu hi August 8, 1994 ah khan Imphal, Manipur-ah a piang a. Kumin April thlaa Asian Championship-ah pawh khan telin, snatch event-ah 86kg a chawi a, clean and jerk-ah 119kg a chawi bawk a, a pumpuiah 205kg chawiin bronze medal a la a. Clean and jerk bika tha taka 119kg a chawi kha world record a ni.
2017 Anaheim World Championship leh 2018 Gold Coast Commonwealth Games ah te khan 48kg ah gold medal a la ve ve a. A hmain 2014 Glasgow Commonwealth Games ah khan 48kg ah silver medal a lo la tawh bawk a. 2020 Tashkent Asian Championships 49kg ah bronze medal lain, 2020 Tokyo Olympics 49kg ah silver medal hi a la leh ta bawk a ni.
2018 ah khan infiammite tana chawimawina sang Khel Ratna a dawng a, India rama infiammi zingah chuan mi mal anga Olympic silver medal dawng thei parukna niin, a hma hian Norman Pritchard, Rajyvardhan Rathore, Sushil Kumar, Vijay Kumar leh PV Sindhu te chuan silver medal an lo dawng tawh hlawm a ni.
Post a Comment