Lawngtlai, July 15, 2021 : Covid-19 hri avanga damlote dahna hmun Thingkah IR Bn. Qtrs. CCC room chhunga tuitling, damlo ten an then/tihfai chungchang Social Media kaltlanga post awm chu vawiin tlai khan Dr. LP Malsawma, Chief Medical Officer, Lawngtlaiin a hmunah a enfiah.
CMO, Lawngtlai chuan helai building hi a sak danin a zir loh avangin duhthusamin a ṭha lo a ti a. A chung lam atangin tui far a awm ṭhin a, nasa lutuk erawh a ni lo tih sawiin, a chung tuitling paih turin NEC hriatpuinain a pang hmun ṭhenkhat chhutkuak a ni bawk a ti.
Dr. LP Malsawma. CMO, Lawngtlai chuan naktuk hian CYLA te nen a hmunah kalin, harsatna awmte an enfiah tur thu a sawi a, hmalak ngai a awm chuan hma an lak nghal dawn thu a sawi bawk.
Thingkah IR Bn. Qtrs. a damlo enkawltute chuan building hi a far ṭhin ngei a, mahse a reng ni lovin, ruahsur tam changah hian a far tam ṭhin tih an sawi a. Tun hmaa damlo awm te nen pawh an then/tihfai ṭhin thu leh hetianga sawinawi hi an awm ngai lo tih an sawi. Thawktute hian staff ho awmna pawh a far ṭhin thu leh light pawh pahnih chiah a en theih thu an sawi bawk.
Helai hmuna awm damlo te sawi danin, tukin zing khan nizana ruah sur nasa avangin room pakhatah phei chuan tui tling hi bucket 8 chuang an paih chhuah thu leh chhawng hnuai zawka room 4 zinga room 3 te chu tui lut hian a tibuai a ni.
Post a Comment