Lawngtlai. July 16, 2021 : Vawiin July 16, 2021 khan State Bank of India, Lawngtlai Branch chuan HSSLC Examination neih zawh taka Commerce Stream a pathumna hauhtu Jeffery H. Lalhriatrenga S/o H. Rohmingzuala, Lungtian hnenah lawmpuina an hlan.
State Bank of India, Lawngtlai Branch Pu Robert Zosangliana chuan, Lawngtlai District ti hmingtha a, hlawhtlinna duhawm tak changtu Jeffery-a SBI ten a lawmpui thu leh a kal lehzelna tura duhsakna an hlan thu a sawi a. Tunah hri leng avangin zirna pawh duh angin a chhunzawm theih loh avangin online hmangin hun eng emaw chen chu class kal a ngaih dawn avangin, hlawhtlinna chang chhunzawm zel tur chuan mahni kan pawimawh ber a ni, tiin theihtawp chhuah zel turin a fuih bawk a ni.
SBI Manager hian Jeffery H. Lalhriatrenga hnenah hian lawmpuina atan Rs, 8,000 leh thuziak a hlan a. Ama pual hian a thlawnin SBI ah Account an hawn sak bawk a ni.
Jeffery H. Lalhriatrenga chuan ni khatah darkar 13 lehkha a zir thin thu a sawi a. A hlawhtlinna kawnga amah lawmpui tu SBI Lawngtlai Branch te chungah lawmthu a sawi bawk a ni.
Post a Comment