Khawvel ennawm ropui ber ti hial an chhal, Summer Olympic vawi 132  chu nimin tlai khan Tokyo khawpui-a Japan National Stadium ah ropui tak a hawn a ni a. Mawngvawm ba ang zat a infiammna hrang hrang kal chhoh pui a ni ang a, August 8 ah he Stadium hrawlpui mi 80,000 zet lenna ah hian a kharna hun hman a ni ang.


Summer Olympic hi khawvel huapa infiammi pungkhawm tamna ber leh infiamna lian leh funkim ber a ni a. Mit leh beng a tlaiin,  a en a man hla tak zet a. Chuvangin, Khawvel ennawm ropui ber an lo ti thinte pawh hi  awm lo hauh lo a ni. Tokyo Olympic hi ruahmanna hmasa ah chuan 24 July - 9 August 2020 a neih tur a a ni a, mahse Covid 19 hripui avanga neih mi rual a nih tak loh avangin a hun hi ti tlaiin, kum khat zet hnuah an nei thei chauh a ni.  Tun hi Tokyo khawpuia Summer Olympic nghah a nih vawi 2na a ni a, kum 1964 khan Tokyo hian Summer Olympic a lo thleng tawh a. Asia khawpui hrang hrang zingah Summer Olympic vawi hnih dawl thei hmasa ber a ni.


Olympic Games meuh han dawl hi chu a mi delh a nain, a hautak bawk a, sum lam pawh an seng nasa hle. Inbuatsaihna atan Tokyo Metropolitan Government chuan US dollar 3.67 billion a ruahman a, Olympic inpui atan a an hman, Japan National Stadium pawh an mahni pawisa Yen maktaduai 100 zet in an chei thar a ni. 


Tokyo Olympic ah hian hripui leng karah ram 205 atangin infiammi 11,326 an fuankhawm a, US chuan infiammi thawh tam berin 613 a tir a, a thlengtu Japan dawt in 552 thawh a, Australia in 478, Germany in 425, China in 406, France in 398, Great Britain in 376 thawhin India pawhin Mizo nula Lalremsiami telin infiammi 120 zet a tir liam ve a ni. Hetih lai hian infiammi pahnih chauh tir ram 13 lai an awm thung a ni. Infiamna 33 hnuaia imtihsiakna hrang hrang  339 ah in elna neih a ni ang. 


Entirnan tuihleuh (swimming) ah ringawt intihsiakna tur 35 lai a awm a, athletic hnuaiah intihsiakna tur  48 zet a awm bawk a ni. Infiamna zingah 3x3 basketball leh freestyle BMX telh thar a ni a, an telh uk tawh mahse an ban leh tak avanga Rio de Janeiro Olympic 2016 ah pawh an telh loh Karate, Sport Climbing, Surfing, Skateboarding te telh thar leh a ni. 


Khawvel a hnam fing leh changkang hmasa Greek hoten Isua pian hma daih a Olympic Games an neih ah kha chuan lawmman ah Oliv hnah thilkhawm te an inpe thin a. Mahse, hun a ralin hma kan sawn chho zel a, tunah chuan hnah thilkhawm ai ah medal an in pe tawh zawk a. 1na chuan Gold medal, 2na in Silver medal, 3na in Bronze medal an dawng ang. 


Hun dangah chuan Medal hi International Olympic Committee (IOC) hotu ten an nghawngah awrh tirin pangpar nen an hlan thin a. Kumin ah hi chuan hripui vangin an tih dan thlakin _tray_ in an hmaah an chawi ang a, an mahni in an awrh mai dawn a ni, an medal hian World Cup leh Euro te angin pawisa erawh a keng tel ve lo a ni.


Chutih laiin medal la te erawh kut bengin an awm ngai thung lo, an ram theuh ten medal an lak manah sum leh paiin an vur awlh thin a ni. Ram hausa a chhiar pawh nipha lo India pawh infiammi medal hawn te tan a inphal zau hle a. Gold medal hawn te chu cheng nuai 75, Silver medal hawn te cheng nuai 40, Bronze medal dawngte cheng nuai 25 pek a tiam a. Sawrkar in a tawktarh aia thahnem zawk mah hi medal an hum haw a nih phawt chuan company lamin an pek a rinawm bawk a ni. Tunlai ah chuan infiammi nih pawh a hlu hle tawh a ni.


Infiam miten Gold medal mithla reng chung a, dawn ngei tumin nasa takin hma an la a. Medal chhe thei, bo thei, riral thei hmu turin theih tawp-a an taksa ti chhelin an inbuatsaih thin. Keini ringtute lallukhum chhe theilo dawng tur te tan phei chuan inbuatsaih nasat a va han ngai leh zual em. Chhumpui nasa tak ang thlirtuten min hual vel avang hian, min tihnawk a piang leh sual keimahnia bet tlat chu dah a. Isua kan rinna siamtu lam chauh en a, kan hma a intlansiakna tur awm ah hian lawmman hmu ngei tur a chhel tak a kan tlan zel a pawimawh tak zet a ni.


- biakthansanga khiangte

Post a Comment

Powered by Blogger.