Thenawm Myanmar ram buai avanga Champhai district-a raltlan tamna ber Tuipuiral Group YMA huam chhungah tun dinhmunah mi 1,473 an lut tawh a, tunah hian chenna tur indaih loh avangin Mizorama rawn luh tum Myanmar atanga raltlan mi 480 vel chu Ţiau lui kam lehlamah an la tangkhang mek.
Champhai khawpui chhungah tun dinhmunah Myanmar aṭanga raltlan mi 583 an awm mek nia thu dawn a ni a. Thu dawnnain an tarlan dan chuan Champhai Kanan Veng YMA in raltlan mi 233 vel an enkawl mek a, Champhai Venglaiah mi 160 awmin Vengthara Covid Care Centre ah mi 84 an awm mek a, Veng leh mimal enkawlna hnuaia awmte nen mi 583 vel Champhai Town ah an awm mek a ni.
Tuipuiral Group YMA President Pu MC Lalramenga sawi danin vawiin thlengin Tuipuiral ah Myanmar aṭanga Mizorama raltlan lo lut mi 1,473 an awm mek a. Raltlante hi Mizorama an rawn luh hlimiOVID19 hri laka invent nan khung hran nghal zel an ni a, Ni 10 hnuah Covid hri an kai leh kai loh RAgT hmanga endik zel an niin an zingah hian tun hnaiah hri kai hmuh an awm rih lo a ni.
Tuipuiral huam chhunga khaw 21-ah te raltlan hi an insem darh a. Farkawnah raltlan hi tam berin 642 an awm a, Vaphaiah 201, Khawbungah 165, Thekteah 173, leh Chawngtuiah 150 an awm a, chungte hi raltlan tam zualna an ni.
Central YMA leh Bialtu MLA Pu Ramthanmawia hmalaknain raltlante awmna tur lailawk, Relief Camp hmun 3- Vaphai, Farkawn leh Zawlseiah te siam a ni a. Silpauline eng emaw zat Group YMA chuan a dawng tawh bawk a. Hmun ţhenkhatah chuan raltlante hi sikul leh vantlang hall-ah te pawh awm tir lailawk an ni bawk.
Hetihlai hian Lunglei ah Myanmar raltlan 170 vel tunah hian awm mek a, an zinga mi thenkhat chuan CoVID-19 hri an kai tih hmuhchhuah a ni a, mahse an awmna vengah inenhranna leh inthliarna engmah awm lovin an awmna veng leh Medical Deptt lam ten pangngai takin tualchhung mite nen an enkawl nia thudawn a ni.
Heng raltlan te hi a hranpa a dahhran an ni lova, a tam zawk chu tlemlai deuh a Mizoram a lo awm tawh, sumdawng te niin tunah pawh hian an chhungte sumdawng a in bengbel te rawn bel an ni tlangpui a ni.
Hetihlai hian Hnahthial Dist-ah chuan mi 600 vel raltlan an an awm tawh ni a thudawn a ni bawk a ni.
Post a Comment