Mizoram pumah COVID19 hri laka invenna vaccine dose nuai 5 Sing 8 & 8420 pekchhuah tawh a ni a, vaccine la thei zat atanga chhutin mi zaa 68 velin vaccine dose khatna hi an la tawh anga chhut a ni.
State Immunization Officer Dr Lalzawmi sawi danin kum 18 leh 44 inkar mi nuai 1, sing 7 leh 3009-in hri danna hi an la tawh a. Nimin khan sorkar hmunah mi 12,640 pek an ni a, mimal enkawl damdawiinah nimin thleng khan mi 1475 hnenah pek a ni bawk.
Kar hmasa chhung khan kum 60 chunglam bakah, kum 45 leh kum 59 inkar leh hri dona hmatawnga thawktu zingah hri danna dose hmasa leh a hnuhnung zawk la an awm zeuh zeuh ve reng bawk a. Mimal enkawl damdawiinah hian hri danna vawikhat lak man hi cheng 780 a ni a, a siamchhuaktute hnen aţangin hri danna hi an lei a, damdawiin hian a pek manah cheng 150/- an dawng ve thung a ni.
Health Minister Dr R. Lalthangliana chuan kum 18 chung lam zawng hri danna dose khatna pek kawngah state dangte nena khaikhinin Mizoram chu a titha pawl a ni tih a sawi a, state leh UT zingah a titha pasarihna a ni a, India hmarchhak state-te zingah chuan a titha pathumna a nih thu leh kum 18 chung lam zawng zawng pek tur bituka chhut zinga zaa 68-te chu hri danna dose khatna pek an ni tawh tih a sawi.
Post a Comment