Lawngtlai 28.July,2021 : Assam Chief Minister Himanta Biswa Sarma chuan Assam chuan Mizoram hnenah Assam inch khat pawh a thehchhuak lo vang a ti. Ramri vengtu Police zawng zawngte chu Assam sawrkar chuan thla khat hlawh a pe chuang (extra salary) ang a ti.
Nimina Silchar a tlawhnaah Assam Chief Minister chuan Mizoram Chief Minister vawiruk a biak thu a sawi a, ‘Hmasawnna atan heng thil hi chinfel a tul a ni” a ti a. Silai a puah tirhin Mizoram Chief Minister chu silai hmehpuah control turin ka ti a ni.
Assam inch khat pawh Mizoramah pek a ni lo vang a, ramri vengtu police zawng zawngte chu Assam sawrkarin thla khat hlawh a pe chuang dawn a ni” a ti. Assam Chief Minister chuan Assam sawrkarin Karimganj, Cachar leh Hailakandi tan commando battalion thum a din ang a, mi 3000 lak an ni ang a ti. Heng Assam district pathum a sawite hi Mizoram district pathum Aizawl leh Kolasib leh Mamit nena Assam inrina a ni a, ramri chu 164 km-a thui a ni.
Assam Chief Minister chuan niminpiah thawhtannia ramri-a thil thlenga Assam Police thi panga chhungte cheng nuai 50 pek a nih tur a puang a. Hetih lai hian Assam Congress chuan thi chhungte hnenah cheng nuai 25 theuh leh hliamte hnenah cheng nuai 10 theuh Assam sawrkar chuan pe turin an phut.
Pu Himanta Biswa Sarma chuan Assam sawrkarin ramri chungchang Supreme Court-a a thlen tur thu a sawi a. “Tumahin reserve forest an encroach thei lo. Ramri buai chu hun rei tak ata tawh a ni a, state pahnih inkar a ni a, political party pahnih inkar a ni lo. Ram kan duh lo a, reserve forest-ah chuan tumah awm lo se kan duh a ni. Ram tel lovin kan awm thei a. Saw lai ram saw kan duh lo. Assam chuan phuba laknaah leh economic blockade-ah rinna a nghat lo” a ti.
Assam sawrkar chuan nimin khan Assam Police panga leh civil mi pakhat thite sun nan ni thum a puang a, hnam puan zar a ngul chanveah zar a ni ang a, Assam-ah eng intihhlimna lam mah siam a ni lo vang.
Assam Chief Minister chuan nimin khan Assam Police thite kuangah pangpar a dah a, hliam mi 60, an zinga 10 chu police enkawlna damdawi inte a tlawh bawk. Hliam zingah Silchar SP Caiblab Chandrakant Nimbalkar a tel a, nimin khan Mumbaia enkawl turin Airforce ambulance-in Mumbai panpui a ni.
Hetih lai hian Congress chuan member pasarih awmna Committee,Assam Congress President Bhupen Bora hruai chu Assam Cachar district leh hmun dang tlawh turin a din a, an report chu Congress partyah an thehlut ang, Assam bialtu Congress hruaitu Jitendra Singh chuan a ti. (Mizo Aw)
Post a Comment