Aizawl, July 30, 2021 : Nimin khan Deputy Chief Minister Pu Tawnluia hovin Department of Information and Public Relations Minister Pu Lalruatkima leh phai lam chanchinbu leh TV-a thawk Mizo journalist-te chu Mizoram pawna thudik puanchhuah leh thehdarh chungchangah kalphung tha zawk ngaihtuahin a pisaah an thukhawm.
Pu Tawnluia chuan State pawn media hrang hrang ten thil thlen dan dik tak an hriat chian a, an thehdarh theihna tura hmanraw pawimawh ber chu National Media Correspondent te an ni, a ti. Mizoram dikna leh thiam channa chu state chhunga hriat ringawt a tawk lova, khawvel hriata au chhuahpui a ngai a ti a. Tun ang boruak chauh loah, hun pangngaiah pawh uar lehzuala National News ah Mizoram hmel a lan tam theih nan tan lak a tul a, chumi atan chuan rawtna te siam turin journalist te a ngen a ni.
Deputy Chief Minister Pu Tawnluia chuan sorkarin boundary committee a din chu vawiin hian an thu ho dawn tih a sawi a, Chanchinbumi te zawhna chhangin Pu Tawnluia chuan NEDA-a MNF an telna chuan Mizoram tana tha an thawhna a dal loh thu a sawi a. Ei leh bar rawn lak luhna kawng chu Assam lam chuan dang mahse, Mizoram tan manganna a awmloh thu sawiin, Cachar lama sumdawng tamtak te pawh Mizoram sum ringa eizawng annih avangin, kawng dan chah kha an mahni tan pawhin hlohna anih thu a sawi bawk.
DIPR Minister Pu Lalruatkima chuan Mizoram leh Assam inrinaa buaina thleng mekah media lama inbeihna nasa takin a thleng a ni, a ti a. National Media a thawk Mizo Journalist te chu an hmachhuan tih sawiin, taima tak leh uar taka Mizoram dinhmun dik tak puangzar turin a fuih a ni.
Meeting-ah hian Mizoram pawn media hrang hranga thawk Mizo Journalist te an tel kim hle a. Rajya Sabha MP hlui Pu Lalhmingliana pawh a tel a ni.
Post a Comment