Primary School kan kal lai khan kan ninhleiin kan va bengchheng thin tehreng em! Pu Mana, Pu Vantluanga, Pu Thana, Pu Rokhuma, Pi Zovi etc te tan khan a luhaithlak thin ngawt ang! Tun lai angin faina kawngah kan la changkang tawk lo va, thlasik lai phei chuan...a... sawi tawh lo zawk teh ang, thangtharte hian mak an ti lutuk palh ang e.
Pawl thum kan zir kum chuan thian kawmngeih tak (hmeichhia) ka nei a. School kan kalhova, kan hlim thei hle thin. Ka thiannute chhungkua hi an chhangchhe hle a. (Pi Neihi’n Chhangchhe bakberh a tih ang hi an ni a) An chhangchhiat em avangin a nu leh pate chuan school kal chhunzawm tawh lova a nauteho awm thin turin an bantir ta a. Tuk khat chu school kal turin kan chhuak diah diah a, ka thiannu chuan nau paw par chungin min lo thlir a, ka va en chian chuan *a mittui a lo tla a!* A school kal chak lutuk, an dinhmunin a zir loh avanga kal thei si lo rilru na lutuk chu a tap a lo ni a. Mitthlaah a cham reng dawn a nih hi. He ka thiannu hi tu nge a nih sawi ka tum lo va, kum 40 chuang kal tawha thil thleng a ni a, hriat a har hle tawh ang. Tunah chuan pasal neiin hlim takin a awm mek a ni.
Chhungkaw harsat vang emaw hriselna chungchang leh harsatna lian tak dang vang pawh ni lova School ban (kal chhunzawm tawh loh) kha *Hmelthatna thurûk* ni tlata hriat hun lai kha a awm a ni mai thei, an bang an bang mai a! Zirna hlutzia hriat tawk loh vang te, lehkha zir peih loh hrim hrim vang te, *thununna hnuaia awm lova duh tawka meizuk theih* duh vang te,.. a... nupui/pasal neih rup duh vangte a ni tlangpui. (Lehkha zir kawnga chak lo mi hi chu awm a ni a, hengte hi chu kan sawi mek huangah hian khung tel a rem lo vang a) Ka thiannu ang khi ni vek se chuan an bang hauh âwm si lo va!
Zirna hi ‘Kawng tinrenga hmasawnna kailawn a ni’ an lo tih thin hi a dik em em a ni. Lehkha thiamna hi sawrkar hna thawhpui nan kan hmang kher lo a nih pawhin (hna a vang em em tawh a, lehkhathiam, sawrkar hna hmu lo tam tak an awm tawh) kan ni tin nunah, eizawnna leh rawngbawlna thlengin a tangkai em em a ni. Lehkhathiam na na na chu eizawnna kawng dangah pawh an taihmak phawt chuan an hmabak a êng (bright) nge nge thin. (Lehkha thiam lo emaw zir sanng lo emaw tan nun khawchhuahna kawng a awm lo tihna erawhchu a ni lo va, lehkha zir mumal zingah mi ropui tak tak an awm teuh tho a ni - an taimak phawt chuan)
Kan ram pawhin hma a sawn ve zel a. Mahni fate school bantir ngai tur khawpa harsa chu kan awm tawh kher âwm lo ve. (Kan lo awm hlauh a nih chuan thupha ka chawi e). Chuvangin, sang tak thlenga kan zirtir thei chiah lo a nih pawhin khawvel tukverha dak ve thei tur tal kan fate zirna kawng zawhtir hi nu leh paten kan tih ngei tur a ni a, i ngai pawimawh thar leh ang u. Sawrkar pawhin zirna a ngai pawimawh a, naupangten zirna kawng an zawh theih nan ruahmanna hrang hrang a siam a, hman tangkai ngei kan tum a ngai a ni.
Tin, lehkha zir lai mekte pawhin zir chhunzawm thei lo tura harsatna bik tak kan nei a nih loh chuan i chhunzawm hram hram ang u. School ban hi *hmelthatna thurûk* a ni chiah lo a ni! Pi Lalrodingi’n, “Zirna avanga kan hah chhung aiin zirna kawnga kan hlawhtlin avanga kan hahdam chhung hi a rei zawk,” a tih hi a dik hle a ni. Ram hmasawnna kal mup mup thau sawk ve thei tur pawh hian a ngaihna hre tur tawk tala lehkha kan thiam ve a ngai a ni. Khai le, i zir sung sung ang u aw.
_(Tukin zing tukthuan kan ei laiin kan chhungkhat hnai tak nu pakhat, ziak leh chhiar a thiam loh avanga an chhungkuain an buai phah dan kan sawi chhuak a. Mitthlaah ka thiannu mittui tla lai kha a rawn lang zawk a, he thu hi ka han ziak ta ngawt mai a ni. - P.C.Vanlalrova)_
Post a Comment